Kasami: Dy deputetë nga opozita shqiptare i bashkangjiten shumicës parlamentare

Kasami: Dy deputetë nga opozita shqiptare i bashkangjiten shumicës parlamentare

Qeveria është stabile dhe ne jemi në bisedime permanente me deputetë nga opozita që t’i bashkohen shumicës parlamentare. Me këtë deklarim, njëri nga partnerët e koalicionit qeverisës të vendit, kryetari i Lëvizjes Besa, Bilall Kasami me bindjen e tij, tha se shuhen dilemat se mund të ketë shumicë të re parlamentare siç po pretendojnë partitë opozitare. Kasami në emisionin “Politica” në Tv Globi tha se ai personalisht është në bisedime me së paku dy deputetë nga opozita shqiptare të cilët mund t’u bashkangjiten atyre. Deklarimet e deritanishme të opozitës se shumica aktuale nuk është stabile, ai i quan fluskula politike, duke shtuar se edhe kryeministri Zaev është në bisedime me deputetë nga radhët e VMRO-DPMNE-së, për t’iu bashkangjitur shumicës.

“Nuk dua të dekonspirojë gjithë këtë situatë, por mund ta garantojë opinionin publik se ka bisedime të tilla dhe unë kam bindje të plotë se këto lëvizje do të rezultojnë me lëvizje drejtë shumicës parlamentare sepse besoj se është kjo qeveri e cila mund të vazhdojë rrugëtimin euro-atlantik të Maqedonisë dhe vlerësojë se Lëvizja Besa është ajo e cila mund t’i zgjidh problemet e shqipëtarëve hap pas hapi në Maqedoni dhe kjo shihet ditëve të fundit nga iniciativa e Lëvizjes Besa që ka të bënë me përmirësimin e të drejtave të shqipëtarëve. Si refleksion, mund të vijë shumë shpejtë që këta deputetë jo t’i bashkohen Lëvizjes Besa, por do t’i bashkohen kampit të politikave të suksesshme të qeverisë dhe në kuadër të sajë politikave të Lëvizjes Besa. … Së paku janë dy deputetë me të cilët ne jemi në komunikim më të afërt”, deklaroi Bilall Kasami, kryetar i Lëvizjes Besa.

Sa i takon propozimit të Lëvizjes Besa për grafën etnike në letërnjoftime, Kasami edhe pse deklaron se ka vullnet te partnerët e koalicionit dhe te të gjithë subjektet politike parlamentare, pos nga Partia “E Majta”, nuk kishte një afat konkret se kur propozimi i tyre mund të bëhet realitet.

“Nuk mund të them këtu datë të ckatuar, por mund të them se nuk do të tolerojmë asnjë ditë të ketë prolongim nëse do të shohim që kjo vjen si rezultat i ndonjë taktizimi nga partitë e shumicës. Deri më tani kemi një dakordësi të plotë me partnerët e koalicionit që kjo çështje të përmbyllet sa më shpejtë në kuadër të procedurave parlamentare”, tha kryetari i Lëvizjes Besa, Bilall Kasami.

Kundër grafës etnike pos partisë “E Majta” doli edhe presidenti i vendit, por Kasami beson se Pendarovski do ta nënshkruaj Ligjin pasi ai të kalon në Kuvend. Nga ana tjetër, ditë më parë ambasadori i BE-së, Dejvid Gir tha se përkatësia etnike, politike dhe fetare në kartat e identitetit do të ndalohet në BE dhe se Maqedonia e Veriut si vend që pret datë për negociata duhet ta harmonizojë këtë çështje me ligjet e BE-së.

Leave a Reply

Your email address will not be published. Required fields are marked *