Partitë të kënaqura me përzgjedhjen e Janevës si prokurore speciale

Partitë të kënaqura me përzgjedhjen e Janevës si prokurore speciale

Pas dorëzimit të propozimit në Parlament për përzgjedhjen e Katica Janevës si prokurore speciale e Maqedonisë, përfaqësuesit e katër partive politike të cilët ishin pjesëmarrëse në negociatat për zbatimin e Marrëveshjes së Përzhinos, shprehen të kënaqur.

Ata nuk tregojnë kush e propozoi Janevën e as sa kandidat tjerë ka pasur për këtë pozitë. Në pyetjen e Portalb, Ilija Dimovski nga VMRO konfirmoi se ka pasur edhe kandidatë të tjerë por se përzgjedhja sipas ty ka qenë “në pajtim me të gjithë pjesëmarrësit në negociata”.

“Unë nuk isha në Klubin e Deputetëve mbrëmë por ju siguroj që përzgjedhja e saj ka qenë në pajtim me të gjithë partitë politike që morëm pjesë në negociatat për zbatimin e Marrëveshjes së Përzhinos. Jemi të kënaqur që është zgjedhur një person që sipas të dhënave është profesionist, ajo me hetimet e saj profesionale duhet përfundimisht tu jep fund të gjitha manipulimeve dhe rrenave që këto 8 muaj u shpërndanë në publik” tha Ilija Dimovski.

Petre Shilegov nga LSDM thotë se partia e tij përfitoi atë që kërkonte me përzgjedhjen e Prokurorit Special.

“Mund të them se  ne jemi më të kënaqurit në këtë rast sepse më në fund do të nis një proces që e kërkuam për një kohë shumë të gjatë. Normalisht që presim obstruksione nga më të ndryshmet posacërisht nga pala që nuk kishte dëshirë të zgjidhet i njëjti. Por kryesorja është që do të fillojë të punojë në mënyrë autonome dhe do të jep përgjegjësi para popullit. ”tha Shilegov.

Artan Grubi nga BDI u shpreh se partia e tij është më se e kënaqur nga përfundimi i këtij procesi me përzgjedhjen e prokurorit special.

“Përfundimisht pas insistimeve të shumta të BDI u soll një ligj me konsensus. Ligji do të miratohet me shumice të dyfishtë dhe Badenter ndërsa edhe Prokurorja do të zgjidhet me votim te dyfishtë dhe Badenter në Këshillin e Prokurorëve.” tha Grubi.

Imer Aliu nga PDSH, gjithashtu përshëndeti marrëveshjen.

“Është me rëndësi për ne si parti që prokurorja të sigurojë terrenin për realizimin e zgjedhjeve të drejta dhe mos të jenë të kriminalizuara” tha Aliu. / Portalb

 

Leave a Reply

Your email address will not be published. Required fields are marked *