Një grup prindërish të fëmijëve të shkollës “Todor Janev” në Çashkë, të cilët bojkotojnë mësimin për të tretën javë për shkak të vendimit të Ministrisë së Arsimit për hapjen e paraleles shqipe, dje kanë sulmuar drejtoreshën, ndërsa policia është dashur të ndërhyjë dhe parandalojë një incident të madh në momentin kur ajo po vinte në oborrin e shkollës, transmeton portali Lideri.mk.
“Hajde hajde drejtoreshë si nuk të vjen turp plehrë”, “Goditeni, shtyjeni, kjo e bëri këtë”, “Ua tradhtare”, bërtisnin prindërit në Çashkë të cilët kanë krijuar mburojë njerëzore tani e tre javë para shkollës, për të penguar hapjen e paraleles shqipe.
Prindërit e nxënësve nuk lejojnë hapjen e një paralele në gjuhën shqipe, e cila është miratuar nga Ministria e Arsimit dhe Kulturës dhe e pranuar nga drejtori, shkruan portali Lideri.mk.
Siç ka njoftuar ministri i Arsimit Jeton Shaqiri, në takimin e fundit me të, prindërit kanë kërkuar që ata nxënës të studiojnë në fshatin Slivnik, i cili ndodhet rreth 11 kilometra nga Çashka. Ministri nuk e pranoi këtë./Lideri
