Ndryshimet në Ligjin për masa kufizuese, të cilat duhet t’u mundësojnë institucioneve maqedonase të marrin masa pas publikimit të emrave konkretë në “listën e zezë” amerikane, ishte një nga temat e takimit të zëvendëskryeministries përgjegjëse për politika të qeverisjes së mirë Sllavica Gërkovska me koordinatorin e Departamentit Amerikan të Shtetit për parandalimin global të korrupsionit, Richard Nephew.
Takimi mes Gërkovskës dhe Nephewt, siç informoi sot shërbimi për shtyp i qeverisë, është zhvilluar në kuadër të Konferencës së shteteve nënshkruese të Konventës së Kombeve të Bashkuara (OKB) kundër korrupsionit, që po mbahet në Atlanta të SHBA-ve.
Ndryshe, nisma për ndryshimin e ligjit është e Gërkovskës dhe vjen pasi disa persona – biznesmenë, ish-zyrtarë dhe aktualë – ishin në listën e sanksioneve amerikane për shkak të përfshirjes së tyre në korrupsion të konsiderueshëm.
Për ndryshimet, siç bëri me dije zv.kryeministrja në takimin me Nephewn, javën e ardhshme duhet të mblidhet një grup pune i drejtuar prej saj.
“Ajo e njoftoi Nephewn se me iniciativën e saj ka filluar një procedurë për ndryshimin e Ligjit për masat kufizuese, ku do të përfshihen aktet juridike të SHBA-së, pas së cilës institucionet maqedonase do të kenë mundësi të marrin masa efektive pas publikimit të emrave konkretë në listën e sanksioneve të SHBA-së, për të cilat grupi i punës që ajo drejton do të mblidhet javën e ardhshme”, thuhet në njoftimin e qeverisë.
Gërkovska po ashtu njoftoi se është duke u përgatitur edhe një zgjidhje tjetër ligjore, e cila gjithashtu do të lidhet me listën e sanksioneve të SHBA-së dhe e cila, siç u tha, do të parashikojë një lloj tjetër të sanksioneve specifike.
Nephew, nga ana e tij, përshëndeti përpjekjet e zëvendëskryeministres Gërkovska për krijimin e mekanizmave efikasë në trajtimin e korrupsionit.
“Ai dërgoi mesazh të qartë se Shtetet e Bashkuara të Amerikës do të vazhdojnë të mbështesin përpjekjet e Republikës së Maqedonisë së Veriut për parandalimin e korrupsionit, duke përfshirë edhe masat që mundësojnë llogaridhënie për ata që dëmtojnë qytetarët dhe të ardhmen e vendit”, njofton Qeveria.
Kjo do të thotë se Nephew ka konfirmuar atë që disa herë e kishte paralajmëruar ambasadorja amerikane në vend, Angela Ageler, se lista e sanksioneve amerikane do të zgjerohet me emra të rinj të qytetarëve të Maqedonisë të përfshirë në korrupsion.
Gërkovska dhe Nephew, shtohet, kanë biseduar edhe për nevojën e forcimit të kapaciteteve të sistemit gjyqësor në fushën e përballjes me korrupsionin dhe krimin e organizuar. Konkluzioni ishte se kjo çështje duhet të jetë një nga prioritetet strategjike të vendit tonë për periudhën e ardhshme.
Zëvendëskryeministrja informoi se përgatitja e Ligjit për konfiskimin e pasurisë në procedurë civile është në fazën përfundimtare, për të cilin tashmë është mbajtur debat publik dhe është marrë mendim nga Komisioni Evropian, pas së cilës do të pasojë implementimi i vërejtjeve.
Ndryshimet ligjore të diskutuara në takimin me Nephewn më 23 nëntor, Gërkovska në një intervistë për “TV Sitel” i njoftoi një javë pasi Sergej Samsonenko, gruaja e tij Irina dhe Ratka Kunovska Kamçeva, nëna e Jordan Kamçevit, ishin në “listën e zezë” të ShBA-së. Në listën e sanksioneve ishin edhe pesë kompani të lidhura me Jordan Kamçevit emri i të cilit u fut në “listën e zezë” të SHBA-së në korrik të këtij viti.
Lista e zezë amerikane u riaktuliazua kur më 5 dhjetor, Departamenti i Shtetit e shpalli Angjushevin të papërshtatshëm për të hyrë në Shtetet e Bashkuara, për shkak të përfshirjes së tij në nivele dukshëm të larta të korrupsionit.
“Gjatë kohës që shërbente si zëvendëskryeministër, Angjushev keqpërdori pozitën e tij zyrtare në favor të interesave të tij private të biznesit, duke minuar besimin e publikut të Maqedonisë së Veriut në institucionet e tyre qeveritare dhe proceset publike”, thuhet në një deklaratë të Departamentit të Shtetit.
Në listë u shtuan gruaja dhe dy fëmijët e tij.
Në deklaratë thuhet se ky veprim tregon se “SHBA-të qëndrojnë në krah të atyre në Maqedoninë e Veriut që kërkojnë llogari nga zyrtarët e korruptuar publikë”, ndërsa Angjushev paralajmëroi se do ta apelojë vendimin.
Ndërkohë, kujtojmë se në raportin e fundit të Komisionit Evropian për Maqedoninë e Veriut, si dhe në raportet e mëparshme, janë shprehur mendime pozitive për punën e komisionit, ndonëse në vitet e fundit, rastet e hapura nga KSHPK-ja shpeshherë janë bërë objekt i “përplasjeve” me gjyqësorin dhe institucionet shtetërore. Komisioni ka reaguar ndaj presioneve në punë dhe prokuroria në një moment ka ngrirë bashkëpunimin me institucionin.
