Shefja e diplomacisë sllovene, Tanja Fajon, deklaratat e Vuçiqit i ka vlerësuar si fyese dhe të papranueshme.
“Ne kërkojmë shpjegim, falje, nuk është në frymën e marrëdhënieve të fqinjësisë së mirë apo miqësore… Ne presim që Serbia të veprojë në frymën e vlerave evropiane që mbron”, tha Fajon, duke shtuar se Vuçiq. deklaratat ishin të pavërteta.
Vuçiq tha dje se Serbia ra në kurthin e ngritur nga SHBA, Zvicra dhe Sllovenia.
“Kur u shty seanca e KS, pyeta se për çfarë bëhej fjalë, por më pas kuptuam se ishin marrë vesh me amerikanët, sllovenët dhe zviceranët. Nuk dihet kush është më i neveritshëm, sllovenët apo dikush tjetër”, ka theksuar dje Vuçiq.
Ndërkohë, presidenti i Serbisë, Aleksandar Vuçiq u ka kërkuar falje sllovenëve.
“Nëse lëndova dikë në Slloveni, kërkoj falje, por nuk do t’u kërkoj falje politikanëve sllovenë”, tha presidenti serb Aleksandar Vuçiq nga Nju Jorku.
“Unë thashë se sllovenët janë të neveritshëm, duke iu referuar seancës së Këshillit të Sigurimit. Kjo ishte tema dhe e kishte të qartë për të gjithë se kishte lidhje me individin dhe me politikën e tyre. Fjalori sigurisht që nuk duhet të përdoret, por njerëzisht e thashë atë që mendoj për politikën e tyre”, tha Vuçiq në fjalimin e tij para gazetarëve.
Ai shtoi se mendon më të mirën për sllovenët si komb dhe se ka shumë miq dhe të afërm në Slloveni.
“Nëse kam ofenduar dikë, dua t’i kërkoj falje gjithë publikut në Slloveni dhe në të njëjtën kohë të them se nuk do t’u kërkoj falje politikanëve sllovenë, sepse ata udhëheqin një politikë të neveritshme ndaj Serbisë dhe popullit serb”, tha Vuçiq.
Ai ka shtuar se deklarata e tij është nxjerrë jashtë kontekstit dhe është vlerësuar si diçka e tmerrshme, por se cenimi i integritetit territorial të Serbisë nuk është vlerësuar si “e tmerrshme”.
“Nuk është e tmerrshme që po sponsorizojnë rezolutën për Srebrenicën kundër popullit tonë, pa u konsultuar më parë me ne, pa na informuar apo pyetur. Shfrytëzoj rastin të ftoj (Kryeministrin e Sllovenisë) Robert Golob dhe Presidenten Natasa Pirc Musar në Beograd dhe Serbi. Natyrisht, më duhet të kërkoj falje edhe një herë, të theksoj se sigurisht që nuk kam menduar për sllovenët, por t’u them atyre në sy se çfarë mendoj për politikën e tyre të keqe ndaj Serbisë dhe popullit serb”, përfundoi Vuçiq.
