Të paktën tetë persona kanë humbur jetën nga një zjarr që ra në një ndërtesë me zyra pranë Moskës, dy prej viktimave u hodhën nga ndërtesa për t’i shpëtuar flakëve.
“Dy burra u hodhën nga dritarja duke u përpjekur të arratiseshin. Fatkeqësisht, ata vdiqën”, tha guvernatori rajonal i Moskës, Andrei Vorobyov, teksa shtoi se gjashtë të tjerë humbën jetën në ndërtesë brenda.
Rreth 30 kompani marrin me qira hapësirë në bllokun e zyrave, dy prej të cilave kishin punonjës që punonin atje në kohën e zjarrit.
“Në ndërtesë kishte edhe bombola oksigjeni, të cilat shkaktuan shpërthime. Kjo çoi në shembjen e pllakave të dyshemesë”, tha guvernatori rajonal, sipas The Guardian.
Agjencia shtetërore e lajmeve Tass tha të hënën se zjarri u shkaktua nga një mosfunksionim i sistemit elektrik. Flakët u përhapën në rreth 5,000 metra katrorë përpara se të merrej nën kontroll.
Ndërmarrjet që marrin me qira zyra në ndërtesë përfshijnë Institutin Kërkimor Platan, i cili prodhon pajisje elektronike.
Zjarret vdekjeprurëse janë të zakonshme në Rusi, e cila për vite ka vuajtur nga standardet e dobëta të sigurisë dhe ka luftuar për të modernizuar ndërtesat e vjetra me alarme dhe pajisje zjarrfikëse.
