Pasqyra e shfrytëzimit të fondeve IPA tregon se nga 302.4 milionë euro në dispozicion, deri në fund të vitit 2023 janë lidhur 58 kontrata në vlerë prej 109.1 milionë euro. Ky është shfrytëzim prej vetëm 34%, deklaroi ministri i Çështjeve Europiane Orhan Murtezani. Kjo, theksoi ai, reflekton një problem më të gjerë të joefikasitetit që rezulton në humbjen e mjeteve të konsiderueshme.
“Si ilustrim në kuadër të këtyre projekteve janë projektet infrastrukturore, seksioni rrugor Drenovë-Gradsko,seksioni hekurudhor Kriva Pallankë kufiri me Bullgarinë, impiantet për trajtimin e ujrave të zeza në Tetovë dhe Manastir, rrjeti i kanalizimit në Kërçovë dhe shumë projekta të tjera. Megjithatë shkalla e e absorbimit është e pamjaftueshme me vetëm 34 % të fondeve në dispozicion të mbuluara nga kontratat e nënshkruara dhe vetëm 22 % të fondeve të paguara”, ka deklaruar Orhan Murtezani, ministër i Cështjeve Evropiane.
Murtezani tha se në fund të vitit 2022 dhe 2023 vendi ka humbur 79 milionë euro dhe se vlerësimet janë se deri në fund të vitit 2024 ekziston rreziku i humbjes së 43 milionë eurove shtesë nga IPA 2. Sipas tij, shkak për shfrytëzimin e dobët dhe joefikas të mjeteve është kuadri i pamjaftueshëm.
