Mbetjet e uraganit Kirk kërcënuan Evropën Perëndimore, me pemë të rrëzuara në Spanjë dhe Portugali dhe me shi të dendur në Francë.
Bëhet e ditur se autoritetet franceze paralajmëruan qytetarët për një rrezik të lartë të përmbytjeve në më shumë se 30 zona.
Parashikuesi shtetëror i motit Meteo France paralajmëroi për erëra që godasin 120-150 km/h në malet Pyrenees dhe deri në 90 mm shi në Paris, shkruan Reuters, përcjell Telegrafi.
Agnes Pannier-Runacher, Ministrja franceze e Energjisë dhe Tranzicionit të Gjelbër, tha se qytetarët duhet të jenë të kujdesshëm gjatë stuhisë, pasi shumë lumenj pritet të vërshojnë.
“Ne duhet të presim përmbytje”, tha ministrja.
“Këto episode ka të ngjarë të përsëriten. Ndryshimet klimatike kanë një ndikim konkret në jetën tonë të përditshme”, shtoi ajo.
Kalimi i Kirk, i cili tani klasifikohet si stuhi, la për pak kohë rreth 400,000 njerëz në Portugalinë veriore pa energji elektrike, sipas operatorit të rrjetit E-Redes.
Autoriteti i mbrojtjes civile të Portugalisë regjistroi rreth 1,600 incidente që nga mbrëmja e së martës, kryesisht pemë të shkulura e degë të rëna që kanë bllokuar rrugët.
Ndryshe, fundi i Kirkut goditi Evropën ndërsa Uragani Milton shpërtheu drejt bregut të Gjirit të Floridës.
