Hungaria është tërhequr nga kërcënimi i vetos dhe ka lejuar rinovimin e sanksioneve të BE-së kundër Rusisë për gjashtë muaj të tjerë, duke i dhënë fund sagës politike jetëshkurtër që e kishte vënë Brukselin në rrezik.
Bëhet e ditur se përparimi u arrit gjatë një takimi të ministrave të punëve të jashtme ku u paraqit një deklaratë për “integritetin e infrastrukturës së energjisë” për të qetësuar shqetësimet e Budapestit.
Sanksionet sektoriale, të cilat përfshijnë ndalime gjithëpërfshirëse për naftën, qymyrin, teknologjinë, financat, mallrat luksoze, transportin dhe transmetimin, si dhe ngrirjen e 210 miliardë eurove në asete nga Banka Qendrore e Rusisë, do të përfundonin më 31 janar, nëse nuk do të kishte unanimitet.
Në ditët përpara afatit vendimtar, Hungaria rriti retorikën e saj kritike, duke argumentuar se inaugurimi i Donald Trump si president i SHBA-së meritonte një rishikim më të gjerë të politikës së bllokut dhe mënyrës se si sanksionet rinovohen çdo gjashtë muaj.
Por, të premten e kaluar, kryeministri Viktor Orban e ndryshoi mendjen kur bëri një lidhje të drejtpërdrejtë me një mosmarrëveshje që Hungaria dhe Sllovakia kanë aktualisht me Ukrainën mbi tranzitin e gazit rus, të cilin Kievi e përfundoi në fund të 2024, shkruan euronews, përcjell Telegrafi.
“Ajo që është mbyllur tani, duhet të rihapet përsëri. Kjo nuk është një çështje për Ukrainën, është një çështje për Evropën, një çështje për Evropën Qendrore”, tha Orban.
“Nëse ukrainasit duan ndihmë, për shembull sanksionimin e rusëve, atëherë le të rihapim rrugët e tranzitit të gazit dhe të lejojmë vendet e Evropës Qendrore, përfshirë Hungarinë, të marrin gazin që na nevojitet përmes Ukrainës”, shtoi ai.
Ndryshe, gjatë fundjavës, presidenti ukrainas Volodymyr Zelensky ofroi shenja kompromisi kur u shpreh i hapur për të lejuar kalimin e gazit azerbajxhanas përmes vendit të tij, diçka që ai e kishte përjashtuar më parë.
“Ka gaz, ka rrugë furnizimi nga Azerbajxhani. Çelësi është të kesh vullnet politik për të punuar për popullin tënd, jo me Moskën për ndonjë përfitim të fshehtë, siç bëjnë disa figura në Evropën Lindore”, tha Zelensky.
Ndërsa vendet pa dalje në det, Hungaria dhe Sllovakia kanë shtyrë fort për vazhdimin e tranzitit përmes Ukrainës, qoftë me gaz rus apo azerbajxhanas, duke paralajmëruar se ekonomitë e tyre kombëtare do të shkatërroheshin nga ndryshimi i menjëhershëm në furnizimet me energji.
Komisioni Evropian, i cili i dha miratimin e heshtur vendimit të Zelenskyt për të ndërprerë kontratën afatgjatë me Gazprom, këmbëngul se ndikimi do të jetë i kufizuar sepse BE-ja është e përgatitur mirë për t’u larguar nga karburantet ruse.
E ndërkohë që kjo grindje me Budapestin ka përfunduar, një tjetër mund të jetë gati të nisë: Brukseli tashmë po përgatit një paketë të 16-të sanksionesh kundër Rusisë, me synimin për t’i miratuar ato përpara përvjetorit të tretë të luftës në fund të shkurtit. Do të kërkohet unanimiteti.
