Izraeli ka liruar 596 palestinezë të tjerë të mbajtur në burgje, si pjesë e raundit të shtatë të shkëmbimit sipas marrëveshjes së armëpushimit në Gaza, raporton Anadolu.
Lirimi erdhi pasi grupi palestinez Hamas ia dorëzoi Kryqit të Kuq trupat e katër pengjeve izraelitë.
Sipas agjencisë zyrtare palestineze të lajmeve Wafa, 37 palestinezë u liruan në Ramallah të Bregut Perëndimor të pushtuar dhe pesë në Kudsin Lindor.
Një i burgosur i pranuar nga Shoqëria Palestineze e Gjysmëhënës së Kuqe, në gjendje kome, u transferua në një spital në Bregun Perëndimor.
Sipas Saleh Al-Hams, drejtorit të infermierisë në Spitalin Evropian të Gazës në Khan Younis, rreth 456 palestinezë u liruan dhe u transferuan në Rripin e Gazës.
“Të burgosurit janë në një gjendje dobësie të rëndë, me disa të paaftë për të ecur për shkak të rrahjeve dhe torturave intensive që kanë duruar”, tha Hams.
Ai shtoi se “shumica e të burgosurve vuajnë nga sëmundjet e lëkurës dhe një rast u shtrua në spital gjatë natës për shkak të fibrozës së mushkërive”.
Zyrtari shëndetësor theksoi se në mesin e të liruarve ishin 15 punonjës shëndetësorë, të cilët u morën në burg nga spitalet gjatë luftës izraelite në Gaza.
Sipas Hamasit, 11 nga të liruarit në Rripin e Gazës ishin të burgosur me dënime të përjetshme ose afatgjata, të cilët ishin arrestuar para 7 tetorit të vitit 2023, ndërsa të tjerët ishin arrestuar nga ushtria izraelite në Gaza pas kësaj.
Hamasi shtoi se 97 të burgosur, që vuanin dënime të përjetshme ose afatgjata, janë deportuar në Egjipt.
Amani Sarahneh nga Shoqata e të Burgosurve Palestinezë tha për Anadolu se autoritetet izraelite kanë bllokuar lirimin e 46 fëmijëve dhe grave të burgosura.
Ajo shtoi se autoritetet izraelite po vonojnë lirimin e tyre deri në verifikimin e plotë të trupave të marrë nga Gaza.
Me transferimin e katër trupave të tjerë mbrëmë vonë, Hamasi përfundoi lirimin e 33 izraelitëve, përfshirë tetë trupa, sipas fazës së parë 42-ditore të armëpushimit që përfundon këtë fundjavë.
Shifrat izraelite thonë se 59 izraelitë mbahen ende në Gaza, me të paktën 20 prej tyre të gjallë, të cilët supozohet se do të lirohen në fazën e dytë të armëpushimit, e cila do t’i kërkonte Izraelit të tërheqë plotësisht forcat e tij dhe t’i japë fund luftës.
Më 19 janar, hyri në fuqi marrëveshja e armëpushimit në Gaza duke ndalur luftën gjenocidale izraelite, e cila që nga tetori i vitit 2023 ka marrë më shumë se 48.300 jetë, kryesisht gra dhe fëmijë, si dhe e ka lënë enklavën në gërmadha.
Nëntorin e kaluar, Gjykata Ndërkombëtare Penale lëshoi urdhër-arreste për kryeministrin izraelit Benjamin Netanyahu dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij në enklavën palestineze.
