Kryeministri në detyrë Albin Kurti ka nisur edhe zyrtarisht diskutimet për formimin e qeverisë.
Në kuadër të kësaj, Kurti ka takuar sot kryetaren e Partisë së Re Demokratike, Emilija Rexhepi, njëherit edhe zëvendëskryeministre në detyrë për Çështje të Pakicave dhe të Drejtat e Njeriut.
Kështu u bë e ditur në njoftimin për media nga Zyra e Kryeministrit.
“Kryeministri i Republikës së Kosovës, Albin Kurti, ka filluar takimet me partitë politike të pakicave, për konsultim me to në lidhje me formimin e qeverisë së re pas certifikimit të rezultatit të zgjedhjeve të 9 shkurtit dhe fillimit të afateve kushtetuese drejt formimit të legjislaturës dhe qeverisë së re”, thuhet në njoftim.
Tutje në njoftim thuhet se gjatë takimit Rexhepi kon konfirmoi gatishmërinë e plotë për vazhdim të bashkëpunimit me Lëvizjen Vetëvendosje si fituese e zgjedhjeve të fundit dhe mbështetjes së Kurtit në formimin e qeverisë së re.
“Kryeministri Kurti e falënderoi znj. Rexhepi për bashkëpunimin e frytshëm, rezultatet e arritura gjatë këtij mandati dhe punët e mbara që na presin në katër vjeçarin e ardhshëm”, thuhet në njoftim.
Kujtojmë se presidentja e Kosovës, Vjosa Osmani, ka thirrur seancën konstituive të Legjislaturës së nëntë të Kuvendit të Kosovës për datën 15 prill 2025.
KQZ-ja certifikoi rezultatet përfundimtare më 27 mars dhe sipas tyre LVV-ja ka fituar 48 ulëse, PDK-ja e dyta me 24 ulëse, LDK-ja 20 dhe koalicioni AAK-Nisma 8 ulëse. /Telegrafi/
