Trajneri i Real Madridit, Carlo Ancelotti ka arritur në gjykatë sot (e mërkurë) për ditën e parë të një gjyqi në të cilin ai akuzohet se nuk ka paguar 1 milion euro tatim mbi të ardhurat nga të drejtat e imazhit gjatë periudhës së tij të parë në klubin mbretëror.
Italiani Ancelotti është i fundit nga disa personazhe të famshëm të futbollit që do të hetohen nga autoriteti tatimor spanjoll për mashtrim të dyshuar tatimor.
Shumë raste, përfshirë ato të lojtarëve kryesorë si Cristiano Ronaldo i Portugalisë dhe Diego Costa i Spanjës, janë zgjidhur jashtë gjykatës me gjoba të mëdha.
Mediumi i njohur Reuters ka publikuar një video nga arritja e Ancelottit për ditën e parë të gjyqit rreth akuzave për evazion fiskal.
Prokurori kërkon një burg prej katër vjet e nëntë muaj dhe një gjobë prej 3.2 milionë euro për dy akuza për evazion fiskal në vitet 2014 dhe 2015.
Konkretisht, Ancelotti akuzohet se ka mashtruar thesarin publik me 1,062,079 euro në vitet fiskale 2014 (386,361 euro) dhe 2015 (675,718 euro) gjatë periudhës së tij të parë si trajner i Real Madridit.
Ai argumenton se Ancelotti kishte raportuar vetëm pagën që i paguhej nga Real Madridi dhe kishte hequr të ardhurat nga të drejtat e tij të imazhit në deklaratat e tij tatimore.
Ancelotti u tha gazetarëve javën e kaluar se kishte besim të plotë në sistemin spanjoll të drejtësisë dhe se mezi priste të dëshmonte në gjykatë.
