Në shkollën e mesme të Gjimnazit të Gostivarit ka katër hidrante për shuarjen e zjarrit dhe të gjithë janë funksionale. Pasi shkolla është dy katëshe, numri i tyre është adekuat dhe në çdo kat ka nga dy të vendosura. Gjatë vizitës që bëmë në këtë shkollë, pamë se pajisjet e tjera, sikurse aparatet ekzistuese PP ishin me afat dhe të mbushura, por numri i tyre duhet të shtohet. Këtë e konfirmi edhe drejtori i kësaj shkolle Mirsad Iseini. Shkolla ka tre hyrje dhe dalje në rast të ndonjë emergjence, tabelë dhe shenja orientuese për dalje emergjente.
“Në shkollën tonë famirësisht jemi të mbuluar me hidrantë. Kemi katër hidrantë brenda, dy poshtë dhe dy në katin lartë, njëri është 25 metra, tre të tjerët janë prej 15 metra. Kemi edhe katër te salla e sportit dhe në bazë të projektit jemi të mbuluar me hidantë dhe të gjithë janë funksional. Si qendron situata me PP aparatet pasi ata kanë afat prej 3 vitesh? Edhe me ato jemi të mbuluar ligjërisht me afat, mirëpo në bazë të projekteve më të reja jemi në minus dhe jemi në fazë përgatitore të një projekti evakumi dhe presim çdo ditë të na vijë projekti se si do të funksionojnë edhe ato. Momentalisht kemi edhe poshtë edhe lartë dhe të gjithë janë me afat”, deklaroi Mirsad Iseini, drejtori i Gjimnazit të Gostivarit.
Ndërkohë, drejtori Iseini thotë se kanë fituar edhe një projekt për simulim dhe evakuim në rast të ndonjë fatkeqësie.
“Tash kemi fituar prej koalicionit ‘Sega’ një projekt për të bërë një simulim, kemi njerëz përgjegjës për raste evakuimi, kemi komision dhe programin e përpiluar dhe të votuar nga Këshilli drejtues …, me letër jemi, por a na ka ndodhur një situatë që të përballemi, nuk kemi pasur dhe nuk e dimë se si është. Pas rastit të Koçanit, do të bëjmë më shpesh simulime që të jemi të përgatitur për situatat që kurrë mos na ndodhshin”, deklaroi Mirsad Iseini, drejtori i Gjimnazit të Gostivarit.
Me urdhër të Komunës së Gostivarit, kontrolle inspektuese të paisjeve kundër zjarrit, po bëhen në të gjitha shkollat. Në fund të javës pritet të jetë gati raporti se si qendron situata, deklaroi kryetari i Komunës së Gostivarit, Valbon Limani.
“Momentalisht përmes Sektorit të arsimit janë dhënë urdhëresa që të kontrollohen të gjitha shkollat në kuadër të Komunës së Gostivarit, dhe këto kontrolle kryehen. Në fund do të kemi një raport nga të gjitha shkollat dhe aty ku do të ketë nevojë për intervenim, Komuna e Gostivarit do të kyçet dhe do të intervenojë me të vetmin qëllim që nxënësit në të gjitha shkollat të kenë siguri”, deklaroi Valbon Limani, kryertar i Komunës së Gostivarit.
Në disa shkolla inspektimet kanë treguar se ka mungesë të aparateve apo hidrantë jo funksional, deklaron Aslian Snopçe, udhëheqëse e Sektorit për arsim pranë Komunës së Gostivarit. Ajo tha se pavarësisht kostos së lartë, komuna është e gatshme gjithçka të mbulojë vetë për sigurinë e nxënësve, pasi MASH nuk ka ndonjë prononcim se kush duhet ti mbulojë këto harxhime.
“Gjithsesi se kjo ka kosto shtesë dhe do na kushton shumë, por siguria e fëmijëve është më me rëndësi dhe momentalisht nga Ministria e Arsimit dhe Shkencës nuk kemi rekomandime se ata do ta bëjnë pagesën. Ne mundohemi vetë me mjetet që i kemi që ti furnizojmë shkollat dhe ta kryejmë obligimin tonë”, deklaroi Aslian Snopçe, përgjegjëse për arsim pranë Komunës së Gostivarit.
Ndryshe, nevoja e funksionalitetit të pajisjeve për shuarjen e zjarrit u aktualizua pas tragjedisë në Koçan.
