Ambasadori Lamberto Zannier, kreu i misionit të vëzhgimit të ODIHR-it njoftoi sot hapjen zyrtarisht të misionit të monitorimit të zgjedhjeve të 11 majit në Shqipëri.
Vëzhguesit nga Zyra e OSBE-së për Institucionet Demokratike dhe të Drejtat e Njeriut (ODIHR) zhvilluan sot një konferencë për shtyp mbi hapjen e misionit të vëzhgimit të zgjedhjeve parlamentare të 11 majit.
Ambasadori Zannieri bëri të ditur se misioni vjen pas një ftese të autoriteteve vendase shqiptare dhe misioni do të përbëhet nga një ekip ekspertësh prej 12 personash të vendosur në Tiranë.
Pjesë e misionit, sipas ambasadorit Zannieri, do të jenë gjithashtu 26 vëzhgues afatgjatë të cilët do të jenë në Tiranë dhe të shpërndarë në Shqipëri, ndërsa 300 vëzhgues afatshkurtër do të vijnë disa ditë para ditës së zgjedhjeve.
Në ditën e zgjedhjeve, ambasadori Zanieri theksoi se do të jetë një mision më i madh me delegacione nga Asambleja Parlamentare e OSBE-së, Asambleja Parlamentare e Këshillit të Europës dhe një delegacion nga Parlamenti Europian.
“Ashtu sikurse ka qenë misioni i OSBE/ODIHR ndër vite, edhe kësaj radhe objektivi i misionit të vëzhgimit të këtyre zgjedhjeve është të vlerësojë mënyrën se si do të kryhen zgjedhjet, nëse ato do të jenë më të rregullta në përputhje me angazhimet që ka ndërmarrë Shqipëria lidhur me OSBE-në, si dhe me detyrime dhe standarde ndërkombëtare që rregullojnë zgjedhjet demokratike, sigurisht edhe nëse janë në përputhje me legjislacionin vendas”, shtoi ai.
Për arritjen e këtij objektivi të misionit të ODIHR-it, ambasadori Zannieri theksoi se “ne do të monitorojmë nga afër të gjitha aspektet e zgjedhjeve duke përfshirë zhvillimet para dhe pas ditës së zgjedhjeve”.
“Disa fusha me interes do të jenë zbatimi i kuadrit ligjor; zhvillimi i fushatës duke përfshirë edhe fushatën në rrjetet sociale; punën e administratës zgjedhore në të gjitha nivelet; zgjidhjen e mosmarrëveshjeve në lidhen me zgjedhjet dhe mbulimin mediatik”, shtoi ai.
Vëzhguesit do të monitorojnë gjithashtu edhe zbatimin e rekomandimeve të mëparshme të ODIHR-it.
Zannieri theksoi se pjesë e këtij procesi do të jenë gjithashtu edhe takime sistematike me përfaqësues të autoriteteve shtetërore, partive politike, shoqërisë civile, medies.
“Sot është fillimi zyrtar i misionit. Pata disa takime prezantuese me Komisionerin e Zgjedhjeve dhe disa anëtarë të KQZ-së, takime që ishin të dobishme e konstruktive”, shtoi ai.
Kreu i delegacionit të misionit të vëzhgimit të ODIHR bëri po ashtu të ditur se në kuadër të transparencës, misioni do të ketë dy javë para zgjedhjeve një raport të ndërmjetëm për aktivitetet e punës.
“Një ditë pas zgjedhjeve do të kemi gjetjet paraprake të misionit të cilat do t’i prezantojmë në një konferencë për shtyp një ditë pas zgjedhjeve dhe në fund procesi në tërësi i vlerësimit të zgjedhjeve do të bëhet përmes raportit përfundimtar i cili do të përmbajë edhe rekomandimet përkatëse dhe do të publikohet disa muaj pas zgjedhjeve”, theksoi ai.
