Dhjetë nga gjithsej njëzet objekte gastronomike në Gostivar që janë kontrolluar deri më tani nuk i plotësojnë kushtet minimale teknike për punë. Midis tyre është edhe një kabare. Kjo është konstatuar nga kontrollet e Inspektororiatit Shtetëror të Tregut – Njësia në Gostivar në bashkëpunim me Policinë, Policinë Financiare dhe Drejtorinë për Mbrojtje dhe Shpëtim, konfirmon për televizionin Globi Emrli Asani, udhëheqës i Inspektoratit të Tregut në Gostivar. Ndaj tyre janë shqiptuar gjoba nga 100 deri në 1000 euro. Nëse nuk i paguajnë brenda 15 ditëve, do të përfundojnë në gjykatë.
“Aktualisht, sipas Ligjit për veprimtari gastronomike, gjegjësisht Rregullores për plotësimin e kërkesave minimale teknike, janë marrë aktvendime me të cilat tregohet eliminimin e lëshimeve në afat prej 15 ditëve. Për shkeljen e konstatuar janë shqiptuar edhe gjoba, gjysma e të cilave duhet të paguhet brenda 8 ditëve. Nëse nuk i paguajnë, do të ngrihet padi në Gjykatën Themelore nga vetë gjykata në Gostivar. Presim që shkeljet t’i eliminojnë vet gastronomët”, deklaroi Emrli Asani – Udhëheqës i Inpektoriatit Shtetëror të Tregut në Gostivar.
Mesin e objekteve të kontrolluara dy veprimtarin e tyre e ushtrojnë në Komunën e Vrapçishtit dhe te të dy, janë konstatuar parregullësi.
Aksioni i kontrolleve të përforëcuara vazhdon, ndërsa 20 objektet e para janë kontrolluar në tre aksione të ndryshme, me datë 19 dhe 22 mars dhe 1 prill. Në të parin janë kontrolluar gjashtë objekte, në të dytin dhjetë dhe në të tretin katër objekte. Gjatë kontrolleve përpos konstatimit të mosplotësimit të kushteve minimale për punë, Asani thotë se janë konstatuar se disa nga këto objekte kanë terraca, por në të shumtën e rasteve ato i kanë pa leje.
Tash për tash nuk ka asnjë objekt të mbyllur, por Asani thotë se me kontrollet e natës që do të zhvillohen ditëve në vijim, pritet të konstatohen shumë parregullësi, pasi në Gostivar aktualisht nuk ka të regjistruar asnjë diskotekë apo klub nate, por realiteti flet ndryshe në terren. Nëse konstatohen se leja për punë nuk përputhet me veprimtarin, disa prej tyre mund të mbyllen, pasi në disa prej tyre ka muzikë të gjallë dhe punojnë deri në orët e para të mëngjesit, ndërsa figurojnë të regjistruar si restorante. Disa nga këto objekte janë kontrolluar tashmë, por pasi ka qenë muaji i Ramazanit, ata janë hasur të mbyllura.
Ndryshe, kontrollet e deritanishme përfshinë kafateritë, restorantet, kabaretë dhe klubet e natës, ndërsa të njejtat vijnë pas tragjedisë së 16 marsit në diskotekën “Pulse” në Koçan ku jetën e humbën 59 persona.
