Komiteti Olimpik i Kosovës (KOK) ka reaguar me anë të një komunikate në lidhje me heqjen e flamurit të Kosovës nga ambientet e Kongresit të 49-të të UEFA-s, të mbajtur në Beograd të Serbisë.
Gjatë të enjtes, UEFA mbajti Kongresin e 49-të të saj, por jo gjithçka shkoi në rregull sa i përket organizimit.
Mikpritësi i Kongresit, Serbia, me anë të njerëzve të saj vendosi të heq flamurin e Kosovës nga ambientet ku do të mbahej Kongresi i UEFA-s duke shkaktuar shumë reagime.
Të fundit që kanë reaguar nga Komiteti Olimpik i Kosovës, i cili ka ngre shqetësim në lidhje me heqjen e flamurit të Kosovës dhe ka kërkuar sqarime nga UEFA.
Postimi i Komitetit Olimpik të Kosovës
Komiteti Olimpik i Kosovës shpreh shqetësimin dhe indinjatën e thellë për veprimin e papranueshëm të heqjes së flamurit të Republikës së Kosovës nga ambientet e Kongresit të UEFA-s, i cili u mbajt në Beograd të Serbisë.
Edhe më shqetësues dhe i turpshëm është fakti që flamuri i vendosur në mesin e flamujve të shteteve tjera përfundoi në duart e huliganëve, të cilët më pas e dogjën përpara ambienteve ku po mbahej Kongresi.
Ky akt përbën një sulm të drejtpërdrejtë jo vetëm ndaj simboleve shtetërore të Kosovës, por edhe ndaj vlerave themelore të sportit: respektit, barazisë dhe përfshirjes.
KOK kërkon sqarime nga organizatori i Kongresit, në këtë rast UEFA, për heqjen dhe djegien e flamurit, e njëkohësisht kërkojmë marrjen e masave të mikpritësit të këtij Kongresi, i cili sipas pamjeve të publikuara edhe gjatë punimeve të Kongresit u përfshi në aktet e heqjes së flamurit.
Kosova dhe institucionet tona sportive janë anëtare të barabarta në të gjitha organizatat përkatëse ndërkombëtare dhe, si të tilla, duhet të trajtohen me dinjitet dhe respekt në çdo ngjarje sportive, pavarësisht se kush është vendi mikpritës.
