Me qindra-mijëra faqe materiale i ka dorëzuar Prokuroria e Hagës në rastin e krerëve të UÇK-së që po zhvillohet në Hagë.
Duke ditur se deri më 15 prill mund të dorëzojnë të gjitha provat, Prokuroria e Specializuar atje, ka dorëzuar numër të madh materialesh. Kësaj radhe, për strukturën, shtabin e përgjithshëm të UÇK-së, qeverinë e përkohshme, dhe anëtarët e të ashtuquajturës “ndërmarrje të përbashkët kriminale”.
Në parashtrimin që e ka parë gazeta Nacionale, Prokuroria e Hagës e pranon edhe vetë se pjesa më e madhe e këtyre dokumenteve, janë marrë nga autoritetet serbe nëpër bazat e Ushtrisë Çlirimtare të Kosovës në kohën e luftës.
“Shumë nga provat e propozuara u konfiskuan nga: (i) autoritetet serbe nga bazat dhe anëtarët e UÇK-së gjatë periudhës së aktakuzës; 74 dhe (ii) Prokuroria nga rezidencat e Jakup KRASNIQI dhe Rexhep SELIMI. Dokumentet që përbëjnë pjesë të koleksioneve përkatëse, të sekuestruara dhe/ose përmbajtjes së tyre janë vërtetuar nga dëshmitarët, të cilat mbështesin autenticitetin e koleksioneve në tërësi, duke marrë parasysh gjithashtu treguesit e shumtë të autenticitetit në pamjen e dokumenteve dhe natyrën e tyre konfirmuese dhe plotësuese”, thuhet në dokumentin e Prokurorisë së Hagës, raporton Nacionale.
Këto prova, ndër të fundit të Prokurorisë, janë në kuadër të mijëra dokumenteve të tjera të zonave të UÇK-së veç e veç, një pjesë e të cilave, gjithashtu ishte siguruar nga autoritetet e Serbisë.
Për çfarë provash bëhet fjalë?
Në këtë dosje të Prokurorisë, janë propozuar prova, që sipas prokurorëve, dëshmojnë strukturën dhe organizimin e Ushtrisë Çlirimtare të Kosovës.
Aty përveç Thaçit, Veselit, Krasniqit e Selimit, përmendën të gjithë anëtarët e asaj që Prokuroria e quan “Ndërmarrje të Përbashkët Kriminale”.
“Provat e propozuara vërtetojnë dhe plotësojnë dëshmitë, si dhe faktet e gjykuara, të cilat, të marra së bashku, demonstrojnë: (i) nivelin e lartë të organizimit të UÇK-së gjatë periudhës së aktakuzës; (ii) që anëtarët e UÇK-së dhe zyrtarët e Qeverisë së Përkohshme në zona dhe në bazat e UÇK-së në Shqipërinë veriore vepruan nën autoritetin dhe në përputhje me udhëzimet e të akuzuarve, Shtabit të Përgjithshëm dhe, se anëtarët e NPK-së, duke përfshirë të akuzuarit, Azem SYLA, Lahi BRAHIMAJ, Fatmir LIMAJ, Sylejman SELIMI, Rrustem MUSTAFA, Shukri BUJA, Latif GASHI, dhe Sabit GECI, dhe disa drejtues të tjerë të lartë të UÇK-së dhe Qeverisë së Përkohshme. Eksponatet e propozuara gjithashtu vërtetojnë dhe plotësojnë prova të tjera dhe fakte të gjykuara në lidhje me krimet e akuzuara, konfliktin e armatosur dhe sulmin e përhapur dhe sistematik kundër popullatës civile, kontrollin efektiv të të Akuzuarve, ndihmën praktike, inkurajimin dhe/ose mbështetjen morale që të akuzuarit ua dhanë autorëve të krimeve”, thuhet në këtë dosje të Prokurorisë së Hagës.
Pra, Prokuroria e Specializuar vlerëson se ish-krerët e UÇK-së kanë pasur njohuri, dhe kanë motivuar krime të ndryshme të pretenduara në zona të ndryshme të Kosovës.
“Siç pasqyrohet në Provat e propozuara, Shtabi i Përgjithshëm takohej rregullisht gjatë periudhës së aktakuzës duke diskutuar dhe vendosur: (i) emërimet, caktimet dhe shkarkimet e anëtarëve të Shtabit të Përgjithshëm, komandave të zonave dhe brigadave, dhe zyrtarëve të Qeverisë së Përkohshme; (iii) rregulloret dhe urdhrat, duke përfshirë në lidhje me policinë ushtarake, shërbimin e rojeve, administratën civile, tatimet, arrestimet dhe sekuestrimin e pronës; (iv) situatën në terren dhe aktivitetet e komandave të zonave, duke përfshirë takimet para dhe pasuese me komandantët e zonave;21 (v) analiza të së shkuarës dhe planet për të ardhmen, operacionet; 23 (vii) mbajtjen e evidencës, mobilizimin, logjistikën, financat, donacionet nga brenda dhe jashtë Kosovës”, thuhet më tutje.
Përveç atyre të siguruara nga Serbia, që e konfirmon edhe vetë Prokuroria, disa prova janë sekuestruar nga shtëpitë e Rexhep Selimit dhe Jakup Krasniqit.
“Për shembull, Ekspozitat e propozuara përfshijnë shënime të njëkohshme të sekuestruara nga rezidencat e Rexhep SELIMIT dhe Jakup KRASNIQI, të cilat datojnë midis pranverës 1998 dhe verës 1999 dhe regjistrojnë, ndër të tjera: (i) kërkesat nga zona dhe komandat vartëse për personel, armë dhe furnizime; (ii) përbërjen, organizimin dhe mbledhjet e Shtabit të Përgjithshëm, strukturat vartëse, duke përfshirë komandat e zonave, brigadat dhe njësitë vendore, dhe PGoK-në; (iii) operacionet dhe situata në terren; (iv) trajnimi, vullnetarët, lejet e udhëtimit, pajisjet e komunikimit dhe masat disiplinore; (v) çështjet e policisë ushtarake”, thuhet më tutje në dokument.
Si rezultat, Prokuroria e Hagës ka kërkuar që këto prova të pranohen.
Prokuroria atje ka afat deri më 15 prill për t’i dorëzuar të gjitha provat materiale./Nacionale.com
