Tronditëse dhe thellësisht alarmante janë për BDI-në deklaratat e Mexhitit, se “nëse Taravari vendos të bashkëpunojë me BDI-në, atëherë qeveria do i bëjë favore BDI- së për të liruar të akuzuar për korrupsion”.
“Ky nuk është një lapsus. Ky është një pranim publik se drejtësia në këtë vend është e kapur, dhe se qeveria mund të ndërhyjë në vendimet e prokurorisë dhe gjyqësorit. Me fjalët e veta, ai konfirmoi se drejtësia nuk funksionon në mënyrë të pavarur, por udhëhiqet nga urdhrat dhe interesat e shefit të tij politik, Hristijan Mickoski. Qeveria bën favore, mbron të përzgjedhurit dhe mban të bllokuar drejtësinë”, thonë nga BDI.
Nga VLEN thonë se pikërisht BDI-ja është emëruesi i përbashkët i të gjitha ndikimeve në drejtësi.
“Nuk ka hipokrizi më të madhe se kur BDI qan për drejtësi. Mjaftojnë vetëm tri pyetje të shpejta: Kush e nisi fushatën mediatike kundër Kryetares së Gjykatës Supreme? A ishte kjo fushatë për të siguruar që faljet e Gjorgje Ivanovit të vlejnë edhe për Nikolla Gruevskin? Kush i solli ndryshimet e turpshme në Kodin Penal? Përgjigjja është e njëjtë për të gjitha: BDI është emëruesi i përbashkët i çdo vendimi të porositur në drejtësi!”, thonë nga VLEN.
VLEN përmend dyshimet dhe akuzat për korrupsion dhe ndërhyrje në drejtësi për Bujar Osmanin, Artan Grubin, Ixhet Mehmetin, Ismail Jahoskin, etj.
