Ylli i Real Madridit, Kylian Mbappe këmbëngul se çerekfinalja e Ligës së Kampionëve nuk ka përfunduar pavarësisht epërsisë 3-0 të Arsenalit në ndeshjen e parë.
“Topçinjtë” kanë një epërsi të konsiderueshme para ndeshjes së dytë të javës së ardhshme në “Santiago Bernabeu” falë dy golave mahnitës nga gjuajtjet e lira të Declan Rice dhe një goli nga sulmuesi Mikel Merino.
Rezultati e lë Real Madridin me një mal të madh për t’u ngjitur, pasi ata kërkojnë të ruajnë kurorën e tyre në Ligën e Kampionëve dhe të fitojnë trofeun për herë të 16-të.
Përmbysja e një deficiti në ndeshjen e parë prej tre golash ose më shumë, megjithëse duket i vështirë, nuk është e pamundur pasi kampionët aktual mund të frymëzohen nga rivalët e hidhur Barcelona, të cilët, në vitin 2017, mundën Paris Saint-Germain 6-1 pasi humbën ndeshjen e parë 4-0 në Paris.
Duke postuar në Instagram pas ndeshjes, Mbappe i ka kërkuar çdo tifozi të Real Madridit që të mos heqë dorë nga shpresa për të arritur në gjysmëfinale të Ligës së Kampionëve.
“Duhet të besojmë deri në fund”, shkroi ai.
Pas largimit nga “Emirates Stadium”, mesazhi i francezit ishte i njëjtë: “Sigurisht që mund të kthehemi”, tha ai.
