Kryeministri i Mbretërisë së Bashkuar Keir Starmer i tha presidentit të Ukrainës Volodymyr Zelensky, gjatë një telefonate të hënën se ai mbështet propozimin e Kievit për një armëpushim të plotë.
Presidenti rus Vladimir Putin shpalli një “armëpushim të Pashkëve” 30 – orësh të shtunën dhe të dielën, por si Ukraina ashtu edhe Rusia kanë akuzuar tjetrin për shkelje të armëpushimit të shkurtër.
Sipas një deklarate të Downing Street, Starmer “përsëriti mbështetjen e tij të hekurt për Ukrainën” dhe se Londra mbështet “thirrjet e Kievit që Rusia të angazhohet për një armëpushim të plotë”. “Tani është koha që Putini të tregojë se është serioz për t’i dhënë fund luftës së tij brutale”, thuhet në deklaratë.
Mbretëria e Bashkuar do të presë një takim në Londër të mërkurën për të diskutuar një armëpushim me përfaqësues nga Ukraina, Franca dhe SHBA.
