SHBA dhe Kina janë dakorduar të ulin ndjeshëm tarifat doganore për mallrat në mënyrë të ndërsjellë për një periudhë 90-ditore, pas bisedimeve të zhvilluara fundjavën e kaluar.
Duke folur nga Gjeneva, ministri amerikan i Financave, Scott Bessent, deklaroi se “të dyja palët do t’i ulin tarifat me 115%” pasi janë pajtuar për një pauzë 90-ditore.
Ky është një hap i rëndësishëm drejt deeskalimit të luftës tregtare që u përshkallëzua muajin e kaluar. Para marrëveshjes së sotme, SHBA kishte rritur tarifat për mallrat kineze në 145% (përfshirë një shtesë prej 20% për të kufizuar importin e fentanilit në SHBA), ndërsa Pekini u kundërpërgjigj me tarifa prej 125% për mallrat amerikane.
Bessent u tha gazetarëve se “të dyja palët treguan respekt të madh” gjatë bisedimeve dhe se “të dyja dëshirojnë një tregti të balancuar”.
