Sezoni veror turistik ka sjellë rritje të frekuencës së automjeteve në hyrje dhe dalje nga shteti, veçanërisht në pikat kufitare Tabanoc dhe Bogorodicë.
Sipas të dhënave nga Lidhja Auto-Moto e Maqedonisë, në Tabanoc për hyrje në vend pritet nga 30 deri në 45 minuta, ndërsa në Bogorodicë koha e pritjes për dalje është rreth 30 minuta.
Në pikat e tjera kufitare qarkullimi zhvillohet pa vonesa të mëdha, ndërsa rrugët anembanë vendit janë të thata dhe të kalueshme. Shoferët paralajmërohen për mundësinë e shembjes së gurëve në disa segmente rrugore, veçanërisht nëpër gryka dhe zona malore.
LAMM u bën apel qytetarëve të udhëtojnë me durim, të përshtatin shpejtësinë dhe të respektojnë rregullat e qarkullimit, veçanërisht gjatë periudhave me intensitet të shtuar të lëvizjes.
