Për këto 30 vite pavarësi, shumë gra, pa dallim nëse vijnë nga sfera politike apo nga ndonjë pjesë tjetër e jetës shoqërore, kanë treguar se kanë mjaft cilësi për të punuar me sukses në pozitat që kanë pasur dhe kanë, konsidron ministrja e Mbrojtjes Slavjanka Petrovska, transmeton Portalb.mk.
“Sot nuk i ndajmë profesionet në të meshkujve dhe të femrave, por ne femrat jemi në çdo profesion sepse besojmë se kemi kapacitet dhe cilësi të mjaftueshme që duhet t’i tregojmë dhe me të cilat duhet të ndihmojmë praktikisht në jetën shoqërore dhe kështu të ndihmojmë edhe vendin tonë”, tha Petrovska në emisionin “Prikazna” në Radio Televizionin e Maqedonisë.
Ajo shton se femrat nuk janë thjesht kuotë dhe numër në shoqëri, por ato japin rezultate reale dhe cilësore. E pyetur nëse shoqëria është e gatshme për një grua – kryeministre apo presidente, Petrovska thekson se nuk bëhet fjalë për gatishmëri, por nëse gratë e suksesshme janë të dukshme për publikun.
“Jam e bindur se qytetarët tanë në zgjedhje, qofshin ato presidenciale, parlamentare apo lokale, në të ardhmen gjithnjë e më pak do të marrin vendime bazuar në faktin nëse kandidati është grua apo burrë, por nëse do të jenë të sigurt në cilësitë e tij“, konsideron Petrovska.
Sa i përket ekspozimit të grave ndaj seksizmit dhe diskriminimit, Petrovska theksoi se kjo dukuri ende ekziston dhe se nevojitet dënim i lartë nga e gjithë shoqëria, veçanërisht për shkak se mund të çojë në dukuri të tjera të padëshiruara si dhuna mendore apo fizike.
“Unë isha subjekt i sulmeve dhe ato kanë qenë kryesisht sulme personale bazuar në pamjen time, mënyrën se si jam veshur. Ata me gjasë kishin vetëm një qëllim dhe ai ishte të më demotivonin që të vazhdoja rrugën që kisha nisur të ecja. Siç mund ta shihni edhe pas tetë muajsh nga fillimi i atyre sulmeve, unë jam ende në të njëjtin pozicion dhe nuk hezitoj të jem këtu. Falenderoj të gjithë kritikët me qëllime të mira, publike dhe private, të cilët më japin sugjerime jo vetëm për sjelljen dhe veshjen time, por edhe për punën, sepse qëllimi i secilit prej nesh është të përpiqemi të jemi më të mirë në atë që bëjmë, ndërsa ka gjithmonë hapësirë të mjaftueshme për komente të mira. Por sulmet ishin surprizë për mua, sepse në këtë pozicion prisja që të diskutonim kritikat për mënyrën e menaxhimit të ministrisë, politikat që drejtoj dhe proceset që ndodhin dhe jo diçka që unë personalisht e konsideroj dytësore”, thotë Petrovska.
Solidariteti mes grave, thekson Petrovska, ishte i dukshëm dhe shumë i rëndësishëm sepse tregon se gratë dhe e gjithë shoqëria janë të bashkuara në dënimin e këtyre sulmeve personale.
“Shoqëria e sheh atë që po ndodh dhe më vjen mirë të shoh këtë lloj reagimi në të ardhmen, sa herë që çdo grua në politikë dhe në publik do të jetë subjekt i sulmeve të tilla personale, kritikave të pabaza apo përçmimeve. Kjo do të thotë se ne gratë dimë të bashkohemi dhe të ndihmojmë njëra-tjetrën”, thotë ministrja Petrovska.
Ditë më parë, për temë të ngjashme, dhunën ndaj grave, foli edhe ministrja e Punës dhe Politikës Sociale së Maqedonisë së Veriut, Jovanka Trençevska. Sipas saj dhuna ndaj grave nuk njeh parti politike, etni, përkatësi fetare, vendbanim, status arsimor dhe social, mjedis rural apo urban. Sipas saj, ky problem i bashkon të gjitha gratë që merren me politikë andaj dhe duhet të reagohet më me guxim kundër dhunës ndaj grave, kumtoi ministria.
