Në kuadër të kontrolleve të përforcuara Ministria e Punëve të Brendshme në territorin e Qytetit të Shkupit gjatë ditës së djeshme i ka shqiptuar gjithsej 128 masa, në mesin e të cilave 20 për shpejtësi të tejkaluar, nëntë për drejtimin e automjetit pa patentë shoferi dhe 11 sanksione për drejtimin e automjetit nën ndikimin e alkoolit.
“Janë shqiptuar shtatë masa për shfrytëzimin e telefonit celular gjatë drejtimit të automjetit, nëntë sanksione për kalim në semafor të mbyllur (ngjyrë e kuqe), pesë sanksione për shoferët fillestarë, 10 masa për kundërvajtjet që i bëjnë drejtuesit e motoçikletave”, thuhet në kumtesën e MPB-së
Nga MPB potencojnë se kontrollet e përforcuara në trafik do të vazhdojnë edhe në ditët në vijim. Apelojnë deri te të gjithë pjesëmarrësit në komunikacion t’u përmbahen rregullave dhe rregulloreve në trafik me qëllim të rritjes së sigurisë në rrugë.
