Rreth 2500 foka janë gjetur të ngordhura në bregun e Detit Kaspik në Rusinë jugore.
Autoritetet në provincën ruse të Dagestanit thanë se ishte e paqartë pse ndodhi ngordhja masive, por ka të ngjarë për shkaqe natyrore.
Zyrtarët rajonalë fillimisht raportuan të shtunën se 700 foka të ngordhura u gjetën në bregdet, por divizioni i Dagestanit i Ministrisë Ruse të Burimeve Natyrore dhe Mjedisit më vonë e ngriti shifrën në rreth 2500.
Zaur Gapizov, kreu i Qendrës për Mbrojtjen e Mjedisit Kaspik, tha në një deklaratë se foka ka të ngjarë të ngordhën disa javë më parë.
Ai shtoi se nuk kishte asnjë shenjë se ata ishin vrarë apo kapur në rrjetat e peshkimit.
Ekspertët nga Agjencia Federale e Peshkimit dhe prokurorët inspektuan vijën bregdetare dhe mblodhën të dhëna për kërkime laboratorike, të cilat nuk zbuluan menjëherë asnjë ndotës.
Disa incidente të mëparshme të vdekjeve masive të fokave iu atribuuan shkaqeve natyrore. Kazakistani, i cili ka një vijë të gjatë bregdetare të Kaspikut, raportoi të paktën tre incidente të tilla këtë vit.
Të dhënat për numrin e fokave në Kaspik ndryshojnë shumë.
Agjencia e Peshkimit ka thënë se numri i përgjithshëm i fokave të Kaspikut është 270,000 deri në 300,000, ndërsa Qendra për Mbrojtjen e Mjedisit Kaspik e ka vendosur numrin në 70,000.
© SYRI.net
