Franca ka mobilizuar në të gjithë vendin 90 mijë forca të policisë dhe xhandarmërisë me qëllim për të garantuar sigurinë në natën e Vitit të Ri, transmeton Anadolu Agency (AA).
Ministri i Brendshëm, Gerald Darmanin, në një deklaratë nga Twitteri njoftoi se për sigurinë e francezëve në natën e Vitit të Ri do të mobilizohen 90 mijë forca të policisë dhe xhandarmërisë.
Në Shanzelize (Champs-Elysees), rrugën më të famshme të Parisit do të mbahet shfaqje e fishekzjarreve e cila zhvillohet pas një pauze 2-vjeçare për shkak të pandemisë së COVID-19.
Sipas të dhënave në faqen e internetit të Bashkisë së Parisit, këtë natë në aktivitetet që do mbahen në Shanzelize parashihet të marrin pjesë 500 mijë njerëz.
