“I urova ambasadorit sukses në përmbushjen e prioriteteve të tij gjatë mandatit të sapofilluar dhe në emër të Aleancës për Shqiptarët e falënderova për bashkëpunimin e shkëlqyer deri më tani me Zyrën OSBE-së në Shkup, e cila ka luajtur një rol të rëndësishëm në vendin në fusha kyçe siç janë shteti i së drejtës, demokratizimi dhe të drejtat e njeriut”, theksoi Taravari.
Me Ambasadorin Wahl, si një njohës i shkëlqyer i rajonit, në takim është biseduar për zhvillimet politike në vend dhe në Ballkanin Perëndimor, duke u dakorduar se duhet rritur përpjekjet për të garantuar stabilitet politik dhe reforma të përshpejtuara në kuadër të proceseve integruese evropiane, si e vetmja alternativë e vendit dhe rajonit.
Kryetari Taravari shprehu gatishmërinë e tij për të thelluar bashkëpunimin e suksesshëm me misionin e OSBE-së, sidomos tani kur Maqedonia e Veriut kryeson me këtë organizatë, roli i së cilës është më se relevant në promovomin e sigurisë dhe demokracisë në këtë fazë delikate për kontinentin evropian.
