Me një mbështetje të re financiare prej 31 milionë dollarësh, Shtetet e Bashkuara vazhdojnë të mbështesin procesin e modernizimit dhe pajisjes së Ushtrisë së Maqedonisë së Veriut sipas standardeve më të larta të Aleancës, kështu njoftoi sot Ministria e Mbrojtjes, transmeton Portalb.mk.
Ministria njoftoi se kjo paketë financiare pason mbështetjen e vitit të kaluar për modernizimin dhe pajisjet me vlerë 106 milionë dollarë.
“Nga fillimi i bashkëpunimit në mbrojtje e deri në vitin 2022, Shtetet e Bashkuara të Amerikës e kanë mbështetur zhvillimin e mbrojtjes dhe ushtrisë me 160 milionë dollarë, ndërsa vetëm në vitin e kaluar Maqedonia e Veriut ka marrë 137 milionë dollarë shtesë nga Amerika”, njoftoi Ministria.
Kujtojmë që SHBA-ja dhe Maqedonia e Veriut në qershor 2022 zhvilluan dialogun e parë strategjik, në të cilin u konfirmua mbështetje financiare shtesë nga SHBA-ja për modernizimin e ushtrisë maqedonase. Të dyja vendet u angazhuan për një bashkëpunim më të madh në mbrojtje dhe intensifikimin e stërvitjeve dhe trajnimeve të përbashkëta.
