Teksa lufta në Ukrainë po vijon në muajin e katërt dhe tensionet mes Lindjes dhe Perëndimit janë në rritje, kjo gjë po shihet qartë edhe në ujërat ndërkombëtarë.
Kudo në botë, nga Baltiku në Paqësor, gjatë javës që lamë pas, fregata, nëndetëse e luftanije ruse janë pozicionuar për të treguar angazhimin e Rusisë për të vijuar përballjen me NATO.
Dhe ky tregim force nga marina e Putin i është afruar shumë dhe brigjeve shqiptare. Analistë italianë shkruajnë se një prej njësive më të fuqishme detare të Rusisë, pikërisht luftanija “Varyag” ka kaluar në detin Jon pranë Pulias.
Ndërkohë që më vonë, anija e dytë më e madhe ruse e luftës, pas “Moskva”-s të mbytur në Ukrainë është drejtuar për nga Adriatiku.
Ndërkohë që në Mesdhe ndodhet dhe luftanija amerikane “Harry Truman” e cila do të qëndrojë si pjesë e angazhimit të SHBA për të siguruar aleatët në rajon përsa kohë që do të vijojë luftën në Ukrainë.
