Moska po tenton ta destabilizojë rajonin e Ballkanit Perëndimor, paralajmëroi një zyrtar i lartë i BE-së, sipas të cilit, kjo është arsyeja përse po insistohet kaq shumë tani për një normalizim të shpejtë të raporteve mes Kosovës dhe Serbisë.
Brukseli duket mendon se në këtë mënyrë, do të reduktohet ndjeshëm hapësira e Moskës në destabilizim. Zyrtari, që foli në kushte anonimiteti, u shpreh madje se ka pasur tentative të Rusisë për të penguar arritjen e marrëveshje për zbatimin e propozimit europian për normalizimin e raporteve.
“Ky është një propozim europian i mbështetur nga të 27 vendet anëtare. Rusia ka bërë disa reagime, përmes ambasadorit në Beograd, duke kërkuar që të mos pranohet propozimi dhe që kjo të shtyhet derisa të mos krijohet ‘një rend i ri botëror’. Këtë e shohim si kërcënim ndaj presidentit Vuçiq që të mos e pranojë propozimin. Deri më tash nuk kemi parë se ka pasur ndikim te Vuçiçi, por ka pasur te një pjesë e opozitës në Serbi”, tha zyrtari.
