Sekretarja e Thesarit e Shteteve të Bashkuara, Janet Yellen, u bëri thirrje të premten anëtarëve të Dhomës së Përfaqësuesve që ta ngrenë kufirin e borxhit federal pa kushte, duke paralajmëruar se dështimi i mundshëm për ta paguar atë do të shkaktonte “kolaps ekonomik dhe financiar”.
Në seancën për buxhetin në Dhomën e Përfaqësuesve, zyrtarja e lartë tha se dështimi për ta rritur kufirin e borxhit prej 31,4 trilionë dollarësh do ta kërcënonte përparimin ekonomik që ShBA-ja e ka bërë që nga pandemia e koronavirusit, raporton agjencia “Reuters”.
“Sipas vlerësimit tim – dhe të atij të ekonomistëve gjerësisht – një dështim për borxhin tonë do të nxiste një katastrofë ekonomike e financiare. U bëj thirrje të gjithë anëtarëve të Kongresit që të bëhen bashkë për ta adresuar kufirin e borxhit – pa kushte dhe pa pritur deri në minutën e fundit”- deklaroi zonja Yellen.
Kur u pyet për mundësinë e dhënies përparësi pagesave për t’i mbuluar pagesat e borxhit të ShBA-së së pari nga burimet e keshit në dispozicion, siç kanë sugjeruar disa anëtarë të Partisë Republikane në opozitë, Yellen tha se kjo “nuk është zgjidhje për problemin e kufirit të borxhit”.
“Dhënia e prioritetit është thjesht mospagimi i të gjitha faturave qeveritare, kur atyre u vjen afati. Kjo është diçka që ne kurrë nuk e kemi bërë që nga viti 1789 dhe ajo është vërtet vetëm dështim (për ta paguar borxhin) me emër tjetër”- tha ajo.
