Ambasada e SHBA-ve në Shqipëri u ka bërë thirrje partive politike, institucioneve dhe autoriteteve shqiptare që të të sigurohen që procesi i zgjedhjeve të kryhet në përputhje të plotë me ligjin dhe standardet ndërkombëtare.
Ndër të tjera në një deklaratë zyrtare, ambasada ka kërkuar që këto zgjedhje të jenë transparente, të lira dhe të sigurta.
Në fund ambasada ka theksuar se SHBA do të mbështesi vullnetin e popullit shqiptar për demokraci të fortë.
“Të dielën, qytetarët shqiptarë do të ushtrojnë të drejtën e tyre demokratike më themelore – të votojnë për udhëheqësit dhe të ardhmen e tyre. Ambasada e Shteteve të Bashkuara u bën thirrje të gjitha partive politike dhe institucioneve që të sigurojnë që veprimtaritë zgjedhore të kryhen në përputhje me ligjin shqiptar dhe me standardet ndërkombëtare. Autoritetet shqiptare duhet të sigurojnë që zgjedhjet të jenë transparente, të lira dhe të sigurta.
Ashtu si në procese të mëparshme, përfaqësues ndërkombëtarë, përfshirë nga ambasada e SHBA do të udhëtojnë përreth vendit si vëzhgues në zgjedhje. Zgjedhjet janë themeli i demokracisë. Drejtuesit e partive patën detyrimin të propozojnë kandidatë të pastër, të denjë për të përfaqësuar popullin shqiptar dhe tani vendimi duhet të jetë në dorën e qytetarëve. Siç kemi bërë gjatë tre dhjetëvjeçarëve të shkuar, Shtetet e Bashkuara do të mbështesin vullnetin e popullit shqiptar për demokraci të forte”, shkruan ambasada.
