Pas skandalit që doli lidhur me shërbimet postare të vizave nga kompania VisaMetric, ka reaguar të premten Ambasada e Gjermanisë në Prishtinë, e cila i siguron aplikantët, se do t‘u rimbursohen mjetet të gjithë atyre të cilëve pas 17 majit, gjatë caktimit të terminit kanë paguar shërbimin postar për kthimin e pasaportës.
Sipas njoftimit për media, ambasada gjermane është në dijeni për arrestimin e drejtorit të qendrës për pranimin e aplikacioneve për viza të VisaMetric dhe se me vëmendje thotë se po ndjek procesin gjyqësor ndaj tij.
“Pasditen e datës 16 maj 2023, ambasada për herë të parë mësoi për vendimin e Gjykatës Komerciale kundër VisaMetric, në të njëjtën ditë, kur VisaMetric përmes avokatit të saj edhe pranoi vendimin e shkallës së dytë. VisaMetric, menjëherë pasi mësoi për aktgjykimin, në konsultim me Ministrinë e Punëve të Jashtme në Berlin dhe Ambasadën Gjermane në Prishtinë, filloi zbatimin e tij. Pas kësaj, dhe që nga dita e nesërme, të gjithë aplikantëve u është dhënë mundësia që në momentin e parashtrimit të kërkesës të zgjedhin mes tërheqjes personale dhe kthimit të pasaportës përmes shërbimit postar me kosto shtesë, si në procedurën e deritashme”, thuhet në njoftimin e ambasadës.
Që nga data 17 maj 2023, sipas njoftimit, opsioni për kthimin e pasaportës me postë nuk është më i detyrueshëm, kur caktoni terminin në mënyrë elektronike. Njoftimin për këtë, VisaMetric e publikoi në mbrëmjen e datës 16 maj në faqën e saj të internetit, thuhet në njoftimin e ambasadës.
“Në kontratën e lidhur në mes VisaMetric dhe Ministrisë së Punëve të Jashtme të Gjermanisë, VisaMetric obligohet të respektojë përcaktimet e Ligjit Federal për Mbrojtjen e të Dhënave dhe Rregulloren e Përgjithshme për Mbrojtjen e të Dhënave. Prandaj, VisaMetric duhet të operojë infrastrukturën e saj të teknologjisë së informacionit në përputhje me kërkesat e Zyrës Federale për Sigurinë e Informacionit për Administratën Publike, dhe mund të ruajë të dhënat personale të aplikantëve vetëm në serverë brenda Zonës Ekonomike Evropiane. Të dhënat e regjistruara alfanumerike dhe biometrike të aplikantëve i dërgohen ambasadës në formë të koduar. Këto të dhëna nuk ruhen në pajisjet e shërbyesit të jashtëm VisaMetric”, njofton Ambasada e Gjermanisë.
VisaMetric, sipas këtij reagimi, edhe më tej është i obliguar që menjëherë pas dërgimit të fshijë të gjitha të dhënat e aplikantëve dhe të sigurojë që për caktimin e terminit të ruhen vetëm emri, të dhënat e kontaktit si dhe numri i pasaportës deri në momentin kur pasaporta i kthehet aplikuesit, dhe që këto të dhëna, siç thuhet më tej në komunikate, të fshihen menjëherë.
“Ambasada në Prishtinë dhe Ministria e Punëve të Jashtme në Berlin kontrollojnë rregullisht VisaMetric për aplikimin e të gjitha rregullave përkatëse. Kjo përfshinë edhe zbatimin e vendimit nga data 16.05.2023 për kthimin e pasaportave me postë si alternativë opcionale. Këto kontrolla përfshijnë vizita të lajmëruara dhe të paparalajmëruara nga stafi i ambasadës në hapësirat e VisaMetric. Gjatë kontrollave, deri më tani, nuk ka pasur asnjëherë arsye për reklamime domethënëse”, thuhet në njoftim.
Ndryshe, VisaMetric është një ndërmarrje e përbashkët e zotëruar 60 për qind ga kompania turke iData dhe 40 për qind nga kompania VMS INVESTMENTS LLC. me bazë në Emiratet e Bashkuara Arabe. “Që kur VisaMetric filloi operimin në Kosovë, në shtator të vitit 2022, kompania nuk ka pasur asnjë lidhje me Rusinë”, thuhet në fund të reagimit të Ambasadës gjermane në Prishtinë.
Të gjitha të dhënat e Ambasadës i gjeni dhe në liqet: (gjermanisht: https://pristina.diplo.de/xk-de/service/faq/1692116?openAccordionId=item-2550264-21-panel,
shqip: https://pristina.diplo.de/xk-sq/service/faq-sq/1692382?openAccordionId=item-2554304-19-panel) si dhe në faqen e internetit të VisaMetric (https://www.visametric.com/kosovo/Germany/en/p/security-and-privacy-policy).
Ndryshe, për problemet që dolën me pagesën postare prej 30 eurosh , ka raportuar në vijimësi edhe RTK.
