“Topi i Artë” për vitin 2023 do të shpallet më 30 tetor në “Théâtre du Châtelet” të Parisit. Ai duket se nuk ka shumë histori. Argjentinasi synonte që këtë vit të mos kishte rival në luftën për trofeun prestigjioz, por shfaqja e Erling Haaland me tripletën sezonale te Man. Sitit mund të ndryshojë mendimin e më shumë se njërit.
Sipas meritave, në të dyja rastet, nuk do të jetë i pamerituar fitimi i çmimit prestigjioz kësaj here. Leo Messi, si çdo vit, ka treguar se çfarë është i aftë të bëjë. Pavarësisht se ndante vëmendjen me Mbappé dhe Nejmar te PSZH, argjentinasi e ka përfunduar sezonin e tij të fundit në Paris me 21 gola dhe 20 asiste, si dhe ka ngritur titullin e Ligue 1. Dhe më pas, sigurisht, është Kupa e Botës, çmimi më i çmuar dhe për të cilin argjentinasi e nis si favorit për ta fituar “Topin e Artë” të radhës.
Në Katar, Leo Messi i tregoi edhe një herë botës se, pavarësisht se tashmë është 35 vjeç, ai mbetet ende lojtari më i talentuar në planet. Me golat e tij, asistet dhe mbi të gjitha lidershipin në fushë e udhëhoqi Argjentinën drejt pushtimit të Botërorit 2022. Ai ishte kyç në momentet më vendimtare, pesha e fitimit të Botërorit të tij të parë mund të jetë një argument pothuajse përfundimtar për të fituar një tjetër “Top të Artë”. Do të ishte i teti për lojtarin më të mirë në histori.
I teti për njërin… dhe i pari për tjetrin
Erling Haaland ka hyrë plotësisht në luftën për “Topin e Artë” të radhës pasi ishte lojtari më vendimtar në “makinën” perfekte që Pep Guardiola ka ndërtuar, Man. Siti e tij. Norvegjezi ka qenë bomberi i skuadrës angleze, i ngarkuar për ta transformuar sulmin.
53 gola, 9 asiste dhe tripletë sezonale (Ligën e Kampionëve, Premier Ligë dhe FA Cup) janë meritë e sulmuesit të fuqishëm. Tripleta e Man. Sitit nuk mund të kuptohet pa praninë e norvegjezit, i cili i ka dhënë të gjithë golat që mund t’i kenë munguar skuadrës së Pep Guardiolës në sezonet e mëparshme.
Do të shohim se çfarë do të ndodhë nga tani deri më 30 tetor, kur do të bëhet dorëzimi zyrtar i “Topit të Artë”. E qartë është se për këtë çmim do të jenë në garë këta të dy. Froni i Karim Benzema më 2022 është në kërkim të një pronari të ri për vitin 2023.
