Kanë nisur që në mëngjes në Bruksel takimet dypalëshe të emisarit të Posaçëm, Miroslav Lajçak me dy kryenegociatorët Besnik Bislimi nga Kosova dhe Petar Petkoviç nga Serbia.
Burimet e Bashkimit Evropian thonë se është synim që delegacionet e Kosovës dhe Serbisë të takohen edhe mes tyre, por një gjë e tillë nuk është konfirmuar.
Radio Europa e Lirë duke iu referuar burime të BE-së, thekson se “kjo do të varet nga vullneti dhe gatishmëria e palëve, më saktësisht e kryenegociatorëve, për t’u takuar mes vete”, edhe Brukseli gjithsesi ka synim që të ketë edhe takim trepalësh.
Kryenegociatorët e Kosovës dhe Serbisë qëndrojnë sot në Bruksel për takime në kuadër të dialogut për normalizimin e marrëdhënieve dhe të çtensionimit të mëtejshëm të situatës të krijuar në veri të Kosovës.
