Juventusi dhe Milani u përballen mes tyre në një miqësore në Kaliforni, sfidë që në fund u fitua nga bardhezinjtë e Allegrit pas goditjeve të penalltive.
Koha e rregullt u mbyll në barazim 2-2. Gjermani Malick Thiaw kaloi Milanin në avantazh falë një goli me kokë (23’), por Juventusi barazoi dhjetë minuta më vonë me anë të brazilianit Danilos.
Festa e bardhezinjve zgjati vetëm gjashtë minuta, pasi Oliver Giroud riktheu skuadrën e Piolit në avantazh. Juvja reagoi sërish sapo filloi pjesa e dytë.
Përsëri një mbrojtës, përsëri gol me kokë. Daniele Rugani shtangu Mike Maignan dhe vendosi barazimin 2-2.
Penalltitë prodhuan emocione, me portierët Carlo Pinsoglio dhe Marco Sportiello që kryen disa pritje të bukura.
Në fund festuan bardhezinjtë, ndërkohë që nga ana e Milanit gabuan Romero, Pobega dhe 17-vjeçari Bartesaghi.
