Një sasi e armatimit është kapur sot në Zveçan, pas një aksioni policor, që u zhvillua në një shtëpi të pabanuar.
Lajmin e ka konfirmuar edhe zëvendësdrejtori i Përgjithshëm i Policisë atje, Veton Elshani, i cili tha se aksioni rezultoi me sekuestrimin e armëve të ndryshme, municion e granata dore.
Elshani shtoi se nuk ka të arrestuar, teksa hetimet lidhur me rastin kanë nisur.
Kujtojmë se më 14 gusht, Policia e Kosovës ka konfiskuar mbi 1.200 fishekë në fshatin Rudine të Zveçanit. Kjo sasi e dyshimtë ishte konfiskuar nga Njësia e saj për Ndërhyrje të Shpejtë, gjatë patrullimeve në atë zonë.
Ndërsa më 11 gusht, Policia e Kosovës i ka arrestuar pesë persona në Zveçan, të cilët kanë gjuajtur me armë zjarri në drejtim të Policisë, derisa kjo e fundit ka thënë të ketë qenë duke e luftuar kontrabandën.
Tensionet në veri të Kosovës kanë qenë të larta sidomos në maj dhe qershor të këtij viti.
