E diela në Maqedoninë e Veriut solli gjashtë ndeshjet e xhiros së tetë në elitën e futbollit vendor.
Ekipet shqiptare dolën me suksese nga kjo xhiro, përveç Voska Sportit që u mund në shtëpi nga skuadra tjetër shqiptare, Shkupi. Shkëndija u rikthye te fitorja, pas atij triumfi ndaj Makedonija Gjorce Petrov, Struga Trim Lum mundi me një gol të vetëm Rabotniçkin, ndërsa Gostivari mposhti Vardarin.
Pas mbylljes së xhiros së tetë, Shkëndija vazhdon kryesimin në renditjen tabelare me 16 pikë të tubuara dhe ka një ndeshje më pak të zhvilluar, por tashmë ndjeket nga Shkupi që me rezultatet e mira, arrin pozitën e dytë dhe 15 pikë të grumbulluara. Dy skuadrat shqiptare pas vetes lënë Brera Strumicën me 14 pikë dhe Sileksin me Tikveshin që kanë nga 13 pikë.
Në pozitën e gjashtë është ngjitur Struga Trim Lum me 12 pikë, duke u ndjekur nga Rabotniçki me dy pikë më pak dhe Bregallnica që ka 9 pikë deri më tani. Katër pozitat e fundit në renditje mbahen nga Makedonija Gj.P. (8 pikë), Voska Sport (7 pikë), Gostivari (6 pikë) dhe Vardari (4 pikë).
Xhiroja e radhës në kampionatin elitar të Maqedonisë së Veriut luhet me 1 tetor.
