Forumi i parë ndërkombëtar kushtuar industrisë së mbrojtjes u mbajt në Kiev nga presidenti ukrainas Volodymyr Zelensky, duke shpresuar të bindë kompanitë në këtë sektor të vendosen në vendin e tij dhe ta ndihmojë atë “të ndërtojë një arsenal” për të mposhtur Rusinë.
Pas fillimit të pushtimit rus në vitin 2022, Ukraina është shumë e varur nga dërgesat e armëve perëndimore. Për shkak të ngadalësisë së kundër-ofensivës ukrainase, e cila filloi në qershor, autoritetet ukrainase kanë frikë se dëshira e Perëndimit për të vazhduar mbështetjen për Kievin në të njëjtën kohë ka rënë.
Në këtë kontekst, Ukraina mblodhi ditën e djeshme në Kiev 252 kompani të sektorit të mbrojtjes nga 30 vende në një forum me qëllim që t’i bindte të vendoseshin në vendin e shkatërruar nga lufta.
“Ne jemi të interesuar të transferojmë në Ukrainë prodhimin e pajisjeve të nevojshme për mbrojtjen tonë dhe sistemet e avancuara të mbrojtjes të përdorura nga ushtarët tanë që i japin Ukrainës rezultatet më të mira në front sot,” vuri në dukje Zelensky.
Qëllimi, sipas presidentit ukrainas, “është krijimi i një arsenali modern dhe të fuqishëm”, ndërsa Rusia po përpiqet gjithashtu të forcojë aftësitë e saj të prodhimit të armëve.
Zelensky njoftoi krijimin e një “aleance të industrive të mbrojtjes” në të cilën tashmë marrin pjesë “13 kompani të vijës së parë”, sipas tij.
Siç shpjegoi presidenti ukrainas, “një fond special për mbrojtjen” do të krijohet me qëllim prodhimin e pajisjeve ushtarake, të cilat do të financohen kryesisht “nga të ardhurat nga shitja e aseteve të sekuestruara ruse”.
Çështja e krijimit të industrive të mbrojtjes në Ukrainë u diskutua gjithashtu gjatë vizitës së fundit të Zelensky në SHBA, sipas presidencës ukrainase.
Këshilltari i Zelenskyt, Andriy Yermak gjithashtu iu referua një marrëveshjeje midis Kievit dhe Uashingtonit për të filluar “negociatat” mbi këtë çështje në të ardhmen e afërt.
