Kancelari gjerman, Olaf Scholz, deklaroi se sulmi në Spitalin Al-Ahli Baptist në Gaza duhet të hetohet tërësisht, transmeton Anadolu.
Scholz, i cili ishte në Egjipt për t’u takuar me presidentin egjiptian, Abdel Fattah al-Sisi, ndau një postim në llogarinë e tij në rrjetet sociale në lidhje me sulmin në spital në Gaza, duke theksuar se “një hetim gjithëpërfshirës i incidentit është thelbësor”.
Kancelari Scholz theksoi gjithashtu se ishte i tmerruar nga pamjet e shpërthimit në spitalin e Gazës dhe tha: “U plagosën dhe u vranë civilë të pafajshëm. Mendimet tona janë me familjet e atyre që humbën jetën”.
Në deklaratën e Ministrisë së Jashtme të Gjermanisë në mediat sociale thuhet se, “Objektivat civile, veçanërisht një spital i plotë me pacientë dhe personel mjekësor, nuk duhet të sulmohen nga askush në asnjë rrethanë. Civilët duhet të mbrohen në konflikte”.
Konflikti Izrael-Palestinë
Krahu i armatosur i Hamasit, Brigadat Izz ad-Din al-Qassam, nisi një sulm gjithëpërfshirës ndaj Izraelit në mëngjesin e 7 tetorit, të quajtur “Tufani i Aksa-së”.
Ndërsa mijëra raketa u hodhën nga Gaza drejt Izraelit, grupet e armatosura palestineze bastisën dhe morën nën kontroll Portën Kufitare Beit Hanun-Erez në kufirin Gaza-Izrael.
Grupet e armatosura më pas hynë nga këtu në vendbanimet brenda Izraelit dhe ushtria izraelite nisi një sulm në Rripin e Gazës me dhjetëra avionë luftarakë.
Raportohet se 1.405 izraelitë, përfshirë 304 ushtarë, vdiqën dhe 3.968 izraelitë u plagosën në sulmet e kryera nga Gaza.
Ministria palestineze e Shëndetësisë njoftoi se mbi 3 mijë persona humbën jetën dhe 12.500 u plagosën në Gaza nga sulmet e Izraelit.
Thuhet se 62 palestinezë vdiqën dhe rreth 1.250 njerëz u plagosën në sulmet e forcave izraelite dhe kolonëve hebrenj në Bregun Perëndimor të pushtuar.
Në sulmet izraelite humbën jetën edhe 13 gazetarë.
Në përleshjet që nisën mes ushtrisë izraelite dhe Hezbollahut në kufirin me Libanin më 8 tetor, humbën jetën 8 anëtarë të Hezbollahut, 2 anëtarë të Xhihadit Islamik, 1 gazetar dhe 2 civilë.
Në sulmet e kryera nga Libani humbën jetën 2 ushtarë izraelitë dhe 1 civil izraelit.
Së fundi, të paktën 500 njerëz humbën jetën në sulmin e Izraelit në Spitalin Al-Ahli Baptist në Gaza.
