Fëmijët po përballen me një situatë “katastrofike” në Gaza, ku prindërit nuk kanë zgjidhje tjetër veçse t’u japin ujë të kripur, sipas agjencisë së OKB-së për ndihmë për fëmijë, Unicef.
Toby Fricker, një zëdhënës i organit, i tha BBC News se mungesat që ekzistonin në Gaza edhe para konfliktit aktual ishin “rritur në një nivel tjetër”.
“Një nga anëtarët e stafit tonë, ka dy fëmijë, një katërvjeçare dhe një shtatëvjeçare dhe thjesht po përpiqet t’i mbajë të sigurta, t’i mbajë ato gjallë në baza të përditshme,” tha ai.
“Ajo tregoi sesi ata po pinë vetëm ujë të kripur, ndërsa i duhet të japë dhe përgjigje pyetjes së vështirë që i drejton vajza e saj: ‘Mama, pse nuk mund ta kem ujin normal që kishim në ditët e zakonshme?’
I pyetur për furnizimet me ndihma që tani kanë mundur të hyjnë në Gaza, Fricker tha: “Ka pasur furnizime, por janë jashtëzakonisht minimale.
“Kur shihni nevojat e jashtëzakonshme në terren që kemi, duhet të ketë shumë, shumë, shumë më tepër.”
Fricker bëri thirrje për një “armëpushim të menjëhershëm humanitar” dhe rritje të ndihmave në Gaza “në baza të qëndrueshme”.
“Ajo që ne po shohim tani në baza të përditshme është se fëmijët po vriten, fëmijët po plagosen, sakatohen,” tha ai.
“Dhe kjo është gjëja numër një – të mbroni jetën e fëmijëve dhe t’i mbani fëmijët gjallë.”
