Katër persona janë shtruar në spital për shkak të helmimit me një pije të gazuar në Kroaci. Tre persona përfunduan në një spital në Zagreb dhe një në Rijekë.
Një i ri është shtruar të martën në Qendrën Spitalore Klinike në Zagreb, i cili dyshohet se është helmuar pasi ka pirë pijen romerquelle në një kafene.
Policia po kryen këqyrjen dhe marrjen e mostrave të pijes së kontestuar për analiza dhe hetime të mëtejshme.
Instituti Kroat i Shëndetit Publik ka marrë mostrat e pijeve joalkoolike që inspektimi sanitar i ka dorëzuar pas një hetimi në një kafene në Rijekë, ku një person së fundmi është sëmurë dhe rezultatet e analizave do t’i dërgohen Inspektoratit Shtetëror.
Bëhet fjalë për një të ri 19-vjeçar, i cili përfundoi në spitalin e Rijekës me plagë të rënda në ezofag dhe stomak pasi kishte pirë një pije freskuese në një restorant.
Ndonëse ka ndodhur të shtunën e 4 nëntorit, asnjë nga autoritetet nuk ka reaguar deri të martën dhe mesazhet për helmimet e dyshuara janë përhapur gjerësisht në rrjetet sociale.
Raportet thonë se acidi kërcënues për jetën përfundoi në shishe pasi tubat u lanë me kimikate në një fabrikë pijesh.
Ministri kroat i Shëndetësisë Vili Beros u tha qytetarëve se është mirë të pini ujë, pasi në këtë kohë askush nuk mund të thotë nëse është e sigurt të konsumohen pije të gazuara.
Mediat kroate përmendin edhe rastet e një djali në Krapinë që përfundoi në spital disa javë më parë pasi kishte pirë lëng molle dhe një burri nga Pula, ezofagu i të cilit u plagos rëndë pasi kishte pirë një gotë me ujë mineral në një restorant në Rijekë në maj.
