DANIMARKË- Danimarka miratoi legjislacionin që kriminalizon protestat islamofobike të djegies së Kuranit. Pas një debati të ashpër mes ligjvënësve, projektligji u miratua me 94 vota pro dhe 77 vota kundër në parlamentin danez prej 179 anëtarësh. Projektligji e bën të paligjshme djegien, grisjen ose ndotjen e teksteve të shenjta në publik ose në internet për t’i shpërndarë ato gjerësisht. Shkelësit mund të rrezikojnë një gjobë ose burgim deri në dy vjet, shkruajnë mediat e huaja.
Ndërsa qeveria e koalicionit tre-partiak votoi pro projektligjit, asnjë anëtar i koalicionit nuk qëndroi për t’iu përgjigjur kritikave të opozitës gjatë debatit në parlament. Social Liberalët (Radikale Venstre) ishte e vetmja parti opozitare që votoi për projektligjin.
Projektligji u prezantua fillimisht në gusht, por më vonë u ndryshua për shkak të shqetësimeve të ngritura brenda koalicionit qeverisës për lirinë e fjalës. Projektligji do të bëhet ligj pas nënshkrimit zyrtar të monarkes daneze, Mbretëreshës Margre, e cila pritet ta nënshkruajë atë më vonë këtë muaj.
Ministria daneze e Drejtësisë tha në një deklaratë se ligji synon të luftojë “talljen sistematike”, e cila rrit nivelet e kërcënimit terrorist në Danimarkë.
“Ne duhet të mbrojmë sigurinë e Danimarkës dhe danezëve,” tha Ministri i Drejtësisë Peter Hummelgaard, duke shtuar, “Kjo është arsyeja pse është e rëndësishme që tani të kemi mbrojtje më të mirë kundër përdhosjeve sistematike që kemi parë për një kohë të gjatë.”
Më herët në gusht, anëtarët e grupit ultranacionalist Danske Patrioter, ose Patriotët danezë, dogjën një kopje të Kuranit përpara ambasadës turke në Kopenhagë. Autorët kanë brohoritur parulla anti-islame gjatë aktit provokues, i cili u krye nën mbrojtjen e policisë. Presidenti turk Rexhep Tajip Erdogan në përgjigje të protestave islamofobike tha se Turqia nuk do t’i dorëzohet kurrë provokimeve apo kërcënimeve.
