Ka nisur ndërtimi i linjës 400 KV mes Shqipërisë dhe Maqedonisë së Veriut, projekt i cili pritet të kushtojë 70 milionë euro dhe përfshin ndërtimin e një linje transmetimi Fier – Elbasan dhe Elbasan – Qafë Thanë. Përfitimet ekonomike të Shqipërisë nga kjo linjë transmetimi do të jenë të mëdha, tha ambasadori gjerman në Shqipëri, Karl Bergner.
“Kjo linjë do t’i mundësojë Shqipërisë dhe Maqedonisë së Veriut për të shkëmbyer energji në tregjet përkatëse. Shqipëria mund të shesë tepricën e saj drejt Maqedonisë së Veriut dhe partnerëve të tjerë në rajon, gjë që është burim shtesë të ardhurash. Është gjithashtu pjesë e korridorit trans-evropian të energjisë elektrike, në kuptim se kjo linjë do të ofrojë lidhjen mes Shqipërisë, Maqedonisë së Veriut, Bullgarisë drejt Italisë.”, – tha ambasadori gjerman në Shqipëri, Karl Bergner, përcjell PRESSonline.al
Ambasadori i BE-së në Tiranë, Silvio Gonzato, teksa theksoi rëndësinë e këtij projekti që do të ndikojë edhe në punësim, tha se kjo linjë transmetimi është në përputhje me objektivat e BE-së, për mbrojtjen e mjedisit.
“Është një projekt që do të krijojë edhe vende të reja pune. Më shumë se 350 vende të reja pune do të krijohen gjatë ndërtimit. Mendoj që kjo ndërlidhje e re do të ndihmojë Shqipërinë në tranzicionin e saj drejt energjisë së pastër dhe dekarbonizimit në përputhje me objektivat e BE-së, për të arritur asnjanësinë klimatike deri në vitin 2050, por kjo linjë e re transmetimi së bashku me nënstacionet e Elbasanit dhe Fierit, do të bëjë të mundur transmetimin e energjisë së rinovueshme brenda për brenda Shqipërisë, por edhe përtej kufijve të saj.”, – u shpreh ambasadori i BE-së në Shqipëri, Silvio Gonzato, përcjell PRESSonline.al
Ky projekt që përflitej prej viteve, do të ndikojë në diversifikimin e burimeve energjetike të vendit, i garanton Shqipërisë lidhje me të gjithë rajonin, si dhe përshpejton punën për të arritur objektivin që të eksportohet energji neto në 2030. Po ashtu kjo lidhje do të ndikojë edhe në uljen e shkëputjeve energjetike dhe defekteve të tjera teknike, si dhe ia rrit Shqipërisë kapacitetet transmetuese me 1,500 megavat orë.
