Tanket izraelite hynë në pjesën perëndimore të Rafahut të enjten, ndërsa ajo pjesë tashmë po përballej me sulme intensive nga helikopterët, dronët dhe artileria në atë që banorët e përshkruan si një nga bombardimet më të këqija të zonës deri më tani.
Sulmi në Rafah deri më tani ka zhvendosur më shumë se një milion palestinezë të fshehur atje, duke i detyruar ata të vendosen në zona me pak ose aspak të qasshme në ushqim, ujë ose strehim të sigurt. OKB-ja ka paralajmëruar se më shumë se një milion njerëz pritet të “përballen me vdekjen ose urinë deri në mes të korrikut”.
Joe Biden paralajmëroi se ai do të ndërpresë dërgesat e armëve të SHBA-së nëse Izraeli vazhdon sulmin në Rafah, pjesërisht për shkak të mungesës së një plani adekuat humanitar për çdo civil që do të zhvendosej, por kryeministri izraelit, Benjamin Netanyahu dhe kabineti i luftës nisën sulm gjithsesi më shumë se një muaj më parë.
Administrata e Bidenit ende nuk e ka ngadalësuar rrjedhën e armëve si përgjigje, duke argumentuar se Izraeli nuk ka kryer ende “operacione të mëdha”.
Megjithatë, njerëzit që jetojnë në Rafah i përshkruan luftimet e vazhdueshme si shkatërruese.
Nga ana tjetër, nga data 13 deri më 15 qershor po mbahet samiti i liderëve të vendeve të G7 në rajonin e Pulias dhe në ditën e parë, pra dje është diskutuar edhe për Gazën.
Në fillim të samitit, këshilltari amerikan për sigurinë kombëtare, Jake Sullivan mohoi që udhëheqja izraelite të kishte “kundërshtuar ose braktisur” propozimin amerikan.
“Deri më sot, ata qëndrojnë pas propozimit që u vu në tryezë në fund të majit dhe të cilin presidenti amerikan, Joe Biden e prezantoi më 31 maj”, tha Sullivan.
Gjithashtu, Sullivan tha se Biden do t’u tregojë liderëve të G7 se marrëveshja e armëpushimit të Gazës është e lidhur me arritjen e qetësisë në kufirin verior të Izraelit. /Telegrafi/
