Presidenti ukrainas Volodymyr Zelensky ka mbërritur sot në Bruksel, ku planifikon të nënshkruajë tre marrëveshje sigurie.
Midis tyre është një marrëveshje me Bashkimin Europian, i cili do të zotohet të vazhdojë të ofrojë armë, trajnime ushtarake dhe ndihmë të tjera në Kiev për vitet në vijim.
Në rast të “agresionit të ardhshëm”, dokumenti, një draft i të cilit është parë nga Reuters, thotë se BE dhe Ukraina synojnë të konsultohen brenda 24 orëve për nevojat e Kievit dhe të përcaktojnë me shpejtësi hapat e ardhshëm në përputhje me angazhimet.
“Për herë të parë, kjo marrëveshje do të përmbajë angazhimin e të 27 vendeve anëtare për t’i ofruar Ukrainës mbështetje të gjerë, pavarësisht nga çdo ndryshim i brendshëm institucional,” tha Zelensky.
Draft dokumenti i BE-së thotë se angazhimet e saj do të mbeten në fuqi “ndërsa Ukraina ndjek rrugën e saj europiane” dhe do të rishikohet më së voni pas 10 vjetësh.
