Presidenti Donald Trump ka ofruar të paguajë pothuajse të gjithë punonjësit federalë që nuk duan të kthehen në zyrë, një lëvizje e madhe që synon tkurrjen e qeverisë amerikane, raporton BBC. Në një email dërguar miliona punonjësve të martën, administrata e tij informoi punëtorët se kanë kohë deri më 6 shkurt për të vendosur nëse duan të jenë pjesë e programit të “dorëheqjes së vonuar”. Nëse ata pranojnë të largohen nga puna deri në atë datë, mesazhi thotë se do të marrin një paketë largimi prej rreth tetë muajsh paga.
Administrata Trump pret që deri në 10 për qind e punonjësve të pranojnë ofertën, që do të thotë rreth 200,000 nga më shumë se dy milionë punonjës të qeverisë federale, sipas informacionit të publikuar nga partneri amerikan i BBC-së, CBS News. Zyrtarë të lartë të administratës Trump u kanë thënë mediave amerikane se paketat e blerjes mund t’i kursejnë qeverisë deri në 100 miliardë dollarë.
Oferta përfshin paga dhe përfitime për punonjësit deri më 30 shtator. Disa punonjës nuk e morën ofertën, duke përfshirë punonjësit e postës, anëtarët e ushtrisë, zyrtarët e emigracionit dhe disa personel të sigurisë kombëtare, thuhej në email. Një mesazh nga Zyra e Menaxhimit të Personelit, agjencia qeveritare e burimeve njerëzore, dërguar mbrëmjen e djeshme gjithashtu paralajmëroi për pushime nga puna në të ardhmen që mund të prekin ata që zgjedhin të qëndrojnë.
“Ne nuk mund t’ju japim siguri të plotë për pozicionin tuaj ose agjencinë, por nëse pozita juaj ndërpritet, ju do të trajtoheni me dinjitet”, thuhet në mesazh.
Email-i pason njoftimin e mëparshëm të Trump se punonjësit federalë që punojnë në distancë për shkak të pandemisë Covid-19 do të duhet të kthehen në zyrë pesë ditë në javë.
