Rumania po përjeton një nga momentet më të trazuara politike në dekadat e fundit, pasi kryeministri i vendit, Marcel Cholaku, njoftoi dorëheqjen e tij të menjëhershme pas rezultateve dramatike në raundin e parë të zgjedhjeve presidenciale.
Dorëheqja e tij vjen pas fitores së qartë të kandidatit të ekstremit të djathtë, Gheorghe Simeon, i cili ka shënuar një triumf të rëndësishëm ndaj partive tradicionale të vendit.
Cholaku, udhëheqës i Partisë Social Demokratike (PSD), një forcë politike e qendrës së majtë, kishte marrë detyrën e kryeministrit në vitin 2023.
Megjithatë, zgjedhjet presidenciale treguan një rënie të thellë të mbështetjes për partinë e tij, me kandidatin e PSD-së, Crin Antonescu, që përfundoi në vendin e tretë, një rezultat zhgënjyes që përshpejtoi dorëheqjen e kryeministrit.
Sipas burimeve mediatike nga Bukureshti, një kryeministër i përkohshëm pritet të emërohet nesër, të martën, ndërkohë që vendi përgatitet për raundin e dytë të zgjedhjeve presidenciale më 18 maj.
Në këtë përballje do të jenë Gheorghe Simeon, lideri i linjës së ashpër nacionaliste dhe populiste, dhe Nicosor Dan, kryetari i pavarur dhe i njohur i Bashkisë së Bukureshtit.
Ky konfigurim elektoral përjashton dy partitë kryesore tradicionale, PSD dhe PNL, nga gara finale, duke shënuar një moment historik që shumë e konsiderojnë si fillimi i fundit për rendin e vjetër politik në Rumani.
Popullariteti i Simeonit dhe rënia e mbështetjes për elitat tradicionale janë sinjale të qarta të një ndërrimi të madh në humorin politik të qytetarëve rumunë.
Është e rëndësishme të kujtohet se Cholaku kishte kandiduar edhe në zgjedhjet e anuluara të vitit të kaluar, ku kishte marrë më pak se 20% të votave.
Pavarësisht se atëherë kishte paralajmëruar dorëheqjen, ai mbeti në detyrë. Këtë herë, me një rezultat edhe më të qartë kundër partisë së tij, largimi u bë i paevitueshëm.
Nga ana tjetër, Gheorghe Simeon ka shfrytëzuar valën e pakënaqësisë popullore për të ndërtuar një platformë që sfidon fort themelet e sistemit politik ekzistues. Në një intervistë të fundit për ‘Politico’, ai kishte paralajmëruar se nëse partitë tradicionale dështonin përsëri, largimi i Cholakut do të ishte i pashmangshëm.
Ai gjithashtu kishte propozuar Calin Gheorghescun, fituesin e zgjedhjeve të anuluara të vitit të kaluar, për kryeministër, por ky i fundit u skualifikua nga procesi.
