Koreja e Veriut ka lëshuar tre raketa balistike mëngjesin e së mërkurës, ka thënë ushtria e Koresë së Jugut, shkruan BBC.
Autoritetet në Seul thanë se raketat u hodhën në hapësirën prej më pak se një ore nga zona Sunan në Phenian.
Kjo vjen vetëm një ditë pasi presidenti amerikan Joe Biden u largua nga rajoni, pas një udhëtimi ku u zotua për të forcuar masat për të frenuar Korenë e Veriut.
Koreja e Veriut ka testuar një sërë raketash balistike që nga fillimi i këtij viti.
Japonia konfirmoi se të paktën dy lëshime ndodhën të mërkurën, por pranoi se mund të ketë pasur më shumë.
Ministri japonez i Mbrojtjes, Nobuo Kishi, ka thënë se raketa e parë fluturoi rreth 300 km me një lartësi maksimale prej rreth 550 km, ndërsa e dyta, duke arritur deri në 50 km, udhëtoi rreth 750 km.
Kishi kritikoi lëshimet, duke thënë se ato ishin “të papranueshme”, duke shtuar se do të “kërcënonte paqen, stabilitetin dhe sigurinë e Japonisë dhe komunitetit ndërkombëtar”.
Në një takim të thirrur pas lëshimit të raketës, Këshilli i Sigurisë Kombëtare i Koresë së Jugut e quajti testin një “provokim të rëndë”.
Bideni pati udhëtim pesë-ditor në Korenë e Jugut dhe Japoninë. Biden kishte thënë se Shtetet e Bashkuara ishin “të përgatitura për çdo gjë që bën Koreja e Veriut”.
