Presidenti Joe Biden ka thënë se presidenti rus, Vladimir Putin është “aktor racional” i cili e ka vlerësuar gabimisht aftësinë e tij për të pushtuar Ukrainën.
“Unë mendoj se ai është një aktor racional që ka llogaritur gabimisht”, ka thënë ai, shkruan CNN-i të martën.
Biden, i cili paralajmëroi javën e kaluar se rreziku i “armagedonit bërthamor” ishte në nivelin më të lartë në 60 vitet e fundit, tha në intervistë se kërcënimet që vijnë nga Rusia mund të rezultojnë në “gabime” dhe “llogaritje të gabuara” katastrofike, edhe pse ai nuk pranoi të shprehej sa saktësisht do të përgjigjeshin Shtetet e Bashkuara nëse Putin vendos një pajisje taktike bërthamore në fushën e betejës në Ukrainë.
Dhe ai tha se do të kishte “pasoja” për Arabinë Saudite pasi ajo u bashkua me Moskën për të njoftuar një ulje të prodhimit të naftës, një veprim që mund të shkaktojë rritjen e çmimeve të gazit me afrimin e zgjedhjeve afatmesme të nëntorit.
Biden, zyrtarët e tij të lartë dhe liderët e tjerë perëndimorë kanë kaluar disa muajt e fundit duke debatuar se çfarë hapash mund të ndërmarrë Putini, derisa trupat e tij pësojnë humbje të turpshme në fushën e betejës në Ukrainë.
Nëse Putini po vepron në mënyrë racionale ka qenë një temë e debatit intensiv ndërsa udhëheqësit punojnë për të parashikuar hapat e tij të ardhshëm. Ndërsa Bideni tha të martën se besonte se vetë Putini ishte racional, ai i karakterizoi qëllimet e liderit rus në Ukrainë, të cilat Putini i paraqiti në një fjalim të zemëruar ndërsa nisi luftën në shkurt, si qesharake.
“Ju dëgjoni atë që ai thotë. Nëse e dëgjoni fjalimin që ai mbajti pas kur u mor vendimi, ai foli për të gjithë idenë – ai duhej të ishte lideri i Rusisë që bashkonte të gjithë rusishtfolësit. Dua të them, thjesht mendoj se është irracionale”, tha Biden.
Duke shkuar më tej, Biden tha se Putin gabimisht besonte se ukrainasit do t’i nënshtroheshin pushtimit rus – një gjykim i gabuar që është hedhur poshtë nga rezistenca e ashpër brenda vendit.
“Mendoj se fjalimi, objektivat e tij nuk ishin racionalë. Unë mendoj se ai mendoi, se do ta mirëprisnin krahëhapur, se kjo ishte shtëpia e Nënës Rusi në Kiev dhe se ku do të pritej, dhe mendoj se ai thjesht e llogariti gabimisht”, tha Biden.
© KOHA.
